ރާއްޖެއިން ބޭރަށް ބޭރަށް ފުރާ ފަސިންޖަރުންގެ އަތުން ނަގަން ނިންމާފައިވާ އެއަރޕޯޓުން ޓެކްސް އާއި ފީ ނެގުމަށް މިއަދުން ފެށިގެން އަމަލު ކުރަން ފަށައިފިއެވެ.

ޤާނޫނަށް ގެނައި އިސްލާހަށް މިއަދުން ފެށިގެން ނަގަން ފަށާފައިވާއިރު، އެއާޕޯޓު ޑިވެލޮޕްމެންޓް ފީ ނަގާނީ ވެލާނާ އިންޓަރނޭޝަނަލް އެއާޕޯޓުން ދަތުރުކުރާ ފަސިންޖަރުންގެ އަތުންނެވެ. ނަމަވެސް ރާއްޖޭގެ އެހެން ސަރަހައްދު ތަކުގެ ބައިނަލްއަޤްވާމީ އެއާޕޯޓު ތަކުން ދަތުރުކުރާ ފަރާތްތަކުގެ އަތުން ނަގާނީ ހަމައެކަނި ޑިޕާޗަރ ޓެކުހެވެ.

މި ބަދަލުތަކާއެކު، ކުރިން އިކޮނޮމީ ކްލާހުގައި ދަތުރުކުރާ ބޭރު މީހެއް އަތުން ނަގަމުން އައި 30 ޑޮލަރުގެ ބަދަލުގައި މިއަދުން ފެށިގެން 50 ޑޮލަރު ނަގާނެއެވެ. ބިޒްނަސް ކްލާހުގައި ދަތުރުކުރާ ފަސިންޖަރެއްގެ އަތުން މީގެކުރިން ނަގަމުން އައި 50 ޑޮލަރުގެ ބަދަލުގައި މިއަދުން ފެށިގެން 120 ޑޮލަރު ނަގާނެއެވެ. ފަސްޓް ކްލާހުގައި ދަތުރުކުރާ މީހެއްގެ އަތުން 90 ޑޮލަރު ނަގަމުން އައިނަމަވެސް، ދެން އެމީހުންގެ އަތުން 240 ޑޮލަރު ނަގާނެއެވެ. ޕްރައިވެޓް ޖެޓް ތަކުގައި ދަތުރުކުރާ ކޮންމެ މީހެއްގެ އަތުން މީގެކުރިން ނަގަމުން އައި 120 ޑޮލަރުގެ ބަދަލުގައި މިއަދުން ފެށިގެން 480 ޑޮލަރު ނަގާނެއެވެ.

ދައުލަތުން ލަފާކުރަނީ މި ފީތަކަށް އައި ބަދަލާއެކު 1.5 ބިލިޔަން ރުފިޔާގެ އާމްދަނީއެއް އަންނަ އަހަރު ލިބޭނެ ކަމަށެވެ.

ރާއްޖެއިން ފުރާ ބޭރު މީހުންގެ އަތުން ނަގާ ފީތަކަށް ބަދަލު އައި ނަމަވެސް، ރާއްޖެއިން ފުރާ ދިވެހިންގެ އަތުން ނަގާ ފީއަށް މިވަގުތު އަދި އެއްވެސް ބަދަލެއް އައިސްފައި ނުވެއެވެ.