ދިވެހި ރައްޔިތުންގެ އަނގަމަތީގައި މަލަން އަޅައި ބަންދު ނުކުރެވޭނެ ކަމަށާއި، އަދި ރައްޔިތުންގެ ހައްގުގައި ވަކާލާތު ކުރުމުގައި އެމްޑީޕީ ފަހަތަށް ނުޖެހޭނެ ކަމަށް، އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، އެ ޕާޓީގެ ސޯޝަލް މީޑިޔާ އެކްޓިވިސްޓެއް ކަމަށްވާ "ޗާލީ ތުއްތު" އެކްސްގައި ކުރި ޕޯސްޓަކާއި ގުޅިގެން އޭނާ ފުލުސް އޮފީހަށް ހާޒިރުވުމަށް ޗިޓު ފޮނުވުމުން އެކަމާއި ގުޅިގެން އެކްސްގައި ޝާހިދު ކުރެއްވި ޕޯސްޓެއްގައެވެ.
ޝާހިދު ވިދާޅުވީ، ބިރު ދައްކައިގެން ތަހުގީގަށް ގެންދިޔުމުގެ ފަލްސަފާ އަލުން ފެށިފައިވާ ކަމަށެވެ. އަދި ރައީސް މުއިއްޒުގެ ސަރުކާރުގެ އަނިޔާވެރިކަމާއި ޚުދުމުހުތާރުކަން އިންތިހާއަށް ގޮސްފައިވާ ކަމަށެވެ.
"ދިވެހި ރައްޔިތުންގެ އަނގަމަތީ ގައި މަލަންއަޅައި ބަންދެއްނުކުރެވޭނެ. ރައްޔިތުންގެ ޙައްޤުގައި ވަކާލާތު ކުރުމުގައި އެމްޑީޕީ ފަހަތަކަށް ނުޖެހޭނެ" ޝާހިދު ވިދާޅުވިއެވެ.
ޝާހިދު ވިދާޅުވީ، ޗާލީ ތުއްތު އެކްސްގައި ފާޅުކުރި ޝުއޫރަކާއި ގުޅިގެން ފުލުސް އޮފީހަށް ހާޒިރުވާން ޗިޓު ފޮނުވާފައިވާއިރު، މީގެކުރިން ގދ. ގައްދޫކައުންސިލް ރައީސް މުހަންމަދު އަހުމަދު ވަޓްސްއަޕް ގުރޫޕެއްގައި ފާޅުކުރި ޝުޢޫރަކާއި ގުޅިގެން ކައުންސިލުން ފިޔަވަޅު އަޅަން އެލްޖީއޭއިންވެސް ނިންމާފައިވާ ކަމަށެވެ.
"ބިރުދައްކަން ތަޙްޤީގަށް ގެންދިޔުމުގެ ސަގާފަތް އަލުން ފެށިއްޖެ." ޝާހިދު ވިދާޅުވިއެވެ.
