ރައްޔިތުންގެ މަޖިލީހުގެ މެންބަރުން ޕާޓީ ބަދަލުކޮށްފި ނަމަ، އަދި ޕާޓީން ވަކިވެއްޖެނަމަ، އަދި ޕާޓީން ވަކިކޮށްފިނަމަވެސް، ގޮނޑި ގެއްލޭގޮތަށް ޤާނޫނު އަސާސީއަށްގެނައި އިސްލާހަކީ ޤާނޫނުއަސީއާއި ޚިލާފު ކަމަށްބުނެ، އެކަން ބާތިލް ކޮށްދިނުމަށް އެދި މަޝްހޫރު ޤާނޫނީ ވަކީލު އަދި މަޖިލީހުގެ ކެންދޫ ދާއިރާގެ ކުރީގެ މަޖިލިސް މެންބަރު އަލީ ހުސެއިން ސުޕްރީމް ކޯޓަށް މައްސަލަ ހުށަހަޅައިފިއެވެ.

އެ މައްސަލަ ސުޕްރީމް ކޯޓަށް ހުށަހަޅާފައިވާކަން ހާމަ ކުރައްވައި، ކުރެއްވި ޓްވީޓެއްގައި އަލީ ހުސެއިން ވިދާޅުވީ، އެއީ ޤާނޫނުއަސާސީގެ 4، 8، 26، 75 އަދި 90 ވަނަ މާއްދާއާ ޚިލާފަށް އަދި ޤާނޫނުއަސާސީގެ އަސާސީގެ އޮނިގަނޑާވެސް ޚިލާފަށް ގެނެސްފައިވާ އިސްލާހެއް ކަމަށެވެ. އެހެންކަމުން  އެ އިސްލާހު ބާތިލު ކުރުމަށް އެދި ސުޕްރީމް ކޯޓަށް މައްސަލަ ހުށަހަޅުއްވާއިވާ ކަމަށް އަލީ ހުސެއިން ވިދާޅުވިއެވެ.

ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު ޤާނޫނު އަސާސީއަށް އިސްލާހު ގެންނަން ބިލ ހުށަހެޅީ މިދިޔަ ބުދަ ދުވަހުއެވެ. އަދި އެ ދުވަހުން އެދުވަހަށް ބިލު ވަނި ފާސް ކޮށްފައެވެ. އަދި ހަމަ އެރޭ ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ވަނީ އެ ބިލު ތަސްދީގު ކުރައްވާފައެވެ.

ޤާނޫނުއަސާސީއަށް ގެނައި އިސްލާހުގައި ވަނީ، ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަކޮށްގެން އިންތިހާބުވުމަށް ފަހު، އެމީހަކު އިންތިހާބުވި ދައުރުގެ ތެރޭގައި އެ ސިޔާސީ ޕާޓީއަކުން އަމިއްލައަށް ވަކިވެއްޖެ ނަމަ، ނުވަތަ ޕާޓީން ވަކި ކޮށްފިނަމަ، ނުވަތަ އެހެން ސިޔާސީ ޕާޓީއެއްގެ މެންބަރަކަށް ވެއްޖެނަމަ، އެ މީހަކު މަޖިލިހުގެ މެންބަރުކަމުން ވަކިވާނެ ކަމަށެވެ.

މެންބަރަކު މިހާރު ތަމްސީލު ކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ، ނުވަތަ ވަކިކޮށްފިނަމަ، ނުވަތަ އެހެން ޕާޓީއަކާ ގުޅުމުންވެސް ގޮނޑި ގެއްލޭނެ ކަމަށް މި ބިލުގައި ބުނެފައިވެއެވެ.

މީގެއިތުރުން އަމިއްލަ ގޮތުން ވާދަކޮށްގެން މަޖިލީހަށް އިންތިހާބުވާ މެންބަރަކު ސިޔާސީ ޕާޓީއަކާ ގުޅިވަޑައިގަތުމުންވެސް މެންބަރުގެ ގޮނޑި ގެއްލޭނެ ކަމަށް ޝާހިދު ހުށަހެޅުއްވި ބިލުގައި ބަޔާން ކޮށްފައިވެއެވެ.