ރާއްޖެއިން ފާނަބަސަންދުގެ ކޭސްތަކެއް ފެނި، ރިޕޯޓު ކޮށްފައިވާ ކަމަށް އެޗްޕީއޭއިން ބުނެފިއެވެ.

އެޗްޕީއޭއިން ބުނީ، އަބަދުވެސް ފާނަބަސަންދުގެ ކޭސްތައް ރިޕޯޓު ކުރަމުން އަންނަ ކަމަށާއި، މިފަހަރު އައީ މާލެ އަތޮޅު ގުޅިން ކަމަށެވެ. އެރަށުން ވަނީ 11 ކޭސްއެއް ރިޕޯޓު ކޮށްފައެވެ.

އެޗްޕީއޭއިން ބުނީ، ގުޅިން ފާނަބަސަންދު ޖެހުނު 11 މީހުންގެ ތެރެއިން 2 މީހަކު އައިޖީއެމްއެޗުގައި އެޑްމިޓްކޮށް މިހާރު ފަރުވާ ދެމުން އަންނަ ކަމަށެވެ.

އެޗްޕީއޭއިން ބުނީ މިއަހަރުގެ މިހާތަނަށް، މުޅި ރާއްޖެއިން، ފާނަބަސަންދުގެ  2977 ކޭސް ރިޕޯޓު ކޮށްފައިވާ ކަމަށެވެ. އެއީ މާލެ ސަރަހައްދުން 1506 ކޭސް އާއި އަތޮޅު ތަކުން 1471 ކޭސްއެވެ.

ފާނަބަސަންދަކީ ވައިރަހަކުން ޖެހޭ ބައްޔެކެވެ. މި ބަލި އާންމުކޮށް ޖެހެނީ ކުޑަކުދިންނަށެވެ. ނަމަވެސް ބޮޑެތި މީހުންނަށްވެސް މި ބަލި ބަޔެއް ފަހަރު ޖެހެއެވެ.  ފާނަބަސަންދުގެ އަލާމާތް ތަކުގެ ތެރޭގައި، ހުން އައުން، ގައިގެ ވަރުދެރަވުން، ނޭފަތުން ފެން އައުން އަދި ހަމުގައި ބިހިތަކެއް ނެގުން ހިމެނެއެވެ.

މި ބައްޔަކީ ބަލި ޖެހިފައިވާ މީހަކު ކެއްސައި، ކިނބިހި އަޅާއިރު ޖެހިގެން ހުންނަ މީހާއަށް ނޭވާލާ ނިޒާމުންވެސް އަރާ ބައްޔެކެވެ. އަދި ފާނަބަސަންދުގެ ބިހި ނަގާފައިވާ މީހެއްގެ ގައިގައި ބީހުމުންނާއި އޭނާ ބޭނުންކުރާ ތުވާލި ފަދަ ތަކެތި އެހެން މީހުން ބޭނުން ކުރުމުންވެސް ބަލި އަރައެވެ.

ފާނަބަސަންދަކީ އާންމު ގޮތެއްގައި އެއްފަހަރު ޖެހޭ ބައްޔެކެވެ. ދެވަނަ ފަހަރަށް މި ބަލި ޖެހުމުގެ ފުރުޞަތު ކުޑަ ކަމަށް ޑޮކްޓަރުން ބުނެއެވެ.

މި ބަލި އިތުރަށް ފެތުރުނަ ނުދިނުމަށްޓަކައި އެޅޭނެ ފިޔަވަޅުތަކުގެ ގޮތުގައި އެޗްޕީއޭއިން ބުނެފައި ވަނީ ބަލި ޖެހިފައިވާ މީހުންގެ ކައިރިއަށް ޒިޔާރަތް ނުކުރުމާއި، ފާނަބަސަންދުގެ ބިހި ނަގާފައިވާ މީހާ، އޭނާގެ ގައިން އެ ބިހިތަކުގެ ކުރަމަގާލި މުޅިން ފިލައި ނުދަނީސް ބޭރަށް ނުކުމެ ނޫޅުމާއި، ގޭގައި އުޅޭ އެހެން މީހުންނާ އެކަހެރިވުމާއި، މި ބަލިން ރައްކާތެރިވުމަށްޓަކައި ޗިކަންޕޮކްސް ވެކްސިން ޖެހުމެވެ. މި ވެކްސިން އާންމުގޮތެއްގައި ބޭސް ފިހާރަ ތަކުން ލިބެން ހުންނާނެ ކަމަށްވެސް އެޗްޕީއޭއިން ބުނެއެވެ.