ތުރުކީވިލާތާއި ރާއްޖެއާ ދެމެދު މިމަހުގެ ހަތަރު ވަނަ ދުވަހު ސޮއި ކުރެވިގެން ގޮސްފައިވާ ވިޔަފާރީގެ އެއްބަސްވުމަށް، އަންނަ އަހަރުގެ ތެރޭގައި އަމަލު ކުރަން ފަށާނެ ކަމަށް ވިޔަފާރި އާއި އިގްތިސޯދާބެހޭ ވަޒީރު މުޙަންމަދު ސައީދު ވިދާޅުވެއްޖެއެވެ.
ޕީއެސްއެމްގައި ވާހަކަ ދައްކަވަމުން ސައީދު ވިދާޅުވީ، އެ އެއްބަސްވުމަށް އަމަލު ކުރަން ފެށޭނީ އަންނަ އަހަރުގެ ފުރަތަމަ ކުއާޓަރުގައި ކަމަށެވެ.
ސައީދު ވިދާޅުވީ، އެއްބަސްވުމުގައި ވާގޮތުން ތުރުކީ އިން ރާއްޖެ އެތެރެކުރާ ގިނަ އަދަދެއްގެ މުދަލުން ޑިއުޓީ މަޢާފު ވެގެންދާނެ ކަމަށެވެ. މިއީ އިންވެސްޓަރުންނާއި، ރިސޯޓު ތަރައްޤީކުރާ ފަރާތްތަކުގެ އިތުރުން އާންމު ވިޔަފާރިވެރިންނަށްވެސް ލުއިފަސޭހަ ތަކެއް ލިބިގެންދާނެ ކަމަށް ކަމަށް ސައީދު ވިދާޅުވިއެވެ.
ސައީދު ވިދާޅުވީ، އެއްބަސްވުމުގެ ސަބަބުން ރާއްޖެއިން ތުރުކީއަށް އެކްސްޕޯޓްކުރާ މަހުގެ ބާވަތް ތަކަށް ލުއިތަކެއް ލިބި، ވިޔަފާރީގެ ހުރަސްތައްވެސް ކުޑަވެގެންދާނެ ކަމަށެވެ. އަދި ދިވެހި މަސްވެރިންނަށް ތުރުކީގެ މާކެޓުގައި ވިޔަފާރި ފުޅާކުރުމުގެ ފުރުސަތު ލިބި، ދިވެހި ރައްޔިތުންނަށް ތުރުކީގެ އުފެއްދުންތައް އަގުހެޔޮކޮށް ލިބޭނެ ކަމަށްވެސް ވަޒީރު ވިދާޅުވިއެވެ.
