އިޒްރޭލްގެ ބޮޑުވަޒީރު ނަތަންޔާހޫ އާއި ކުރީގެ ޑިފެންސް މިނިސްޓަރު ޔޯއަވް ގަލަންޓް ހައްޔަރު ކުރުމަށް ބައިނަލްއަޤުވާމީ ޖިނާޢީ ކޯޓު (އައިސީސީ) އިން ނެރެފައިވާ އަމުރު ތަންފީޒު ކުރުމަކީ ފަލަސްތީނުގެ މިނިވަންކަމަށްޓަކައި މުހިންމު ކަމެއް ކަމުގައި ރައީސުލްޖުމްހޫރިއްޔާ ޑރ. މުޙަންމަދު މުއިއްޒު ވިދާޅުވެއްޖެއެވެ.
އައިސީސީގެ އަމުރާއި ގުޅިގެން ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ އައިސީސީން އެފަދަ އަމުރެއް ނެރުނީތީ ރާއްޖެއިން މަރުހަބާ ކިޔާ ކަމަށެވެ. އަދި ވިދާޅުވީ، އައިސީސީގެ އެނިންމެވުމަކީ ފަލަސްޠީނުގައި ހިންގަމުންދާ އިންސާނިއްޔަތާއި ޚިލާފު ޖަރީމާތަށް ހުއްޓުވައި އިސްރާއީލު ޖަވާބުދާރީ ކުރުވުމަށްޓަކައި ކޮންމެހެން އަޅަން ޖެހިފައިވާ ފިޔަވަޅެއް ކަމަށެވެ.
ރައީސް ވިދާޅުވީ ބައިނަލްއަގްވާމީ ކޯޓު ތަކުން ކުރާ ހުކުމް ތަކަށް ރާއްޖެއިން ފުރިހަމައަށް އިހްތިރާމް ކުރާނެ ކަމަށާއި، އައިސީސީގެ ހުކުމަށްވެސް ރާއްޖެއިން އިހްތިރާމް ކުރާނެ ކަމަށެވެ. އަދި ފަލަސްތީނަށް އިންސާފު ހޯދައިދީ، އެ ގައުމަށް މިނިވަންކަން ހޯދައިދިނުމަކީ މުހިންމު ކަމެއް ކަމުގައިވެސް ރައީސް ވިދާޅުވިއެވެ.
އައިސީސީން ނަތަންޔާހޫ އާއި ކުރީގެ ދިފާއީ ވަޒީރު ގަލާންޓް ހައްޔަރު ކުރަން ހުކުމް އިއްވިއިރު، ޙަމާސް ޖަމާޢަތުގެ އިސް ތިން ވެރިއަކު ހައްޔަރު ކުރުމަށް އަމުރު ނެރުމަށްވެސް އައިސީސީން ދަނީ މަސައްކަތް ކުރަމުންނެވެ.
އައިސީސީއަކީ ހަނގުރާމައިގެ ކުށްތަކާއި, އިންސާނިއްޔަތާ ޚިލާފު ކުށްތަކާއި, ގަތުލުއާންމު ތަކުގެ މައްސަލަތައް ބަލާ ދުނިޔޭގެ އެންމެ މަތީ ކޯޓެވެ. އެއީ މިނިވަން މުސަތަގިއްލު ކޯޓެކެވެ.
