ރައްޔިތުންގެ މަޖިލީހުގެ މެމްބަރުން، އިންތިޚާބުވާ ޕާޓީ ނޫން ޕާޓީއަކަށް ބަދަލުވުމުންނާއި، ޕާޓީން އެ މެމްބަރަކު ވަކިކޮށްފި ނަމަވެސް، މެމްބަރު ކަމުގެ ގޮނޑި ގެއްލޭގޮތަށް އިއްޔެ އޮތް ރައްޔިތުންގެ މަޖިލީހުގެ ޖަލްސާގައި ޤާނޫނުއަސާސީއަށް ގެނައި ބަދަލާއެކު، ކުރީގެ ޑިފެންސް މިނިސްޓަރު މާރިޔާ އަޙްމަދު ދީދީ ސަރުކާރާމެދު ވަރަށް ބޮޑަށް ނުރުހުން ފާޅު ކުރައްވައިފިއެވެ.
އެކަމާގުޅިގެން މާރިޔާ އެކްސްގައި ވިދާޅުވީ، ޤާނޫނުއަސާސީއަށް ޕީއެންސީގެ ފަރާތުން ގެނައި އިސްލާހު ތަކާއެކު، ރަައްޔިތުންގެ އާންމު ވޯޓުން ރައްޔިތުން ގެނައި ތިން ބާރު ވަކިވެފައިވާ ރިޔާސީ ނިޒާމް "ފުނޑާލައިފި" ކަމަށެވެ.
މިކަން މާރިޔާ ސިފަކުރެއްވީ މުޅި ދައުލަތް ރައީސްގެ އަތްޕުޅަށް "މަހާލުން" ކަމަށެވެ. އަދި ރައްޔިތުންގެ މަޖިލިސް ވާކޮށްލުން ކަމަށެވެ.
"ރައީސުލް ޖުމްހޫރިއްޔާގެ މުށަށް މުޅިދައްލަތް އެމަހާލީ. ސަރުކާރު ޖަވާބްދާރީ ކުރުވުމުގެ ދައުރު ގެއްލި މަޖްލިސް ވާކޮށްލީ" މާރިޔާ ވިދާޅުވިއެވެ.
ޤާނޫނުއަސާސީއަށް އިއްްޔެ ގެނައި އިސްލާޙާމެދު، މާރިޔާގެ ނުރުހުން އައިއިރު، އެމްޑީޕީގެ މަޖިލިސް މެމްބަރުންވެސް އިއްޔެ ވަނީ ކަންބޮޑުވުން ފާޅު ކުރައްވައި، އެ އިސްލާޙާ ދެކޮޅު ހައްދަވާފައެވެ.
