ރައްޔިތުންގެ މަޖިލިސް މެންބަރުން ޕާޓީ ބަދަލުކޮށްފި ނަމަ، ގޮނޑި ގެއްލޭގޮތަށް ގާނޫނު އަސާސީއަށް އިސްލާހު ގެންނަން ހުށަހަޅައި ބިލްގެ އިބްތިދާއީ ބަހުސް ނިންމައި ދިރާސާ ކުރުމަށް މުޅި މަޖިލީހުގެ ކޮމިޓީއަށް ފޮނުވައި، ކޮމިޓީގައި މެންބަރުން ބިލަށް ހުށަހެޅި އިސްލާހުތަކަށް މެންބަރުންގެ އަނގަބަހުން ވޯޓު ނަގަން ފަށައިފިއެވެ.
މަޖިލީހުގެ ރައީސް އަދި މުޅި މަޖިލިސް ކޮމިޓީގެ މުގައްރިރު އަބްދުއްރަހީމް އަބުދުﷲ މެންބަރުންގެ އަނގަބަހުން ވޯޓު ނަންގަވަން ނިންމެވީ، ވޯޓު ސިސްޓަކަށް ޖެހުނު މައްސަލައަކާ ގުޅިގެންނެވެ.
ކޮމިޓީ ބައްދަލުވުމުގައި، ބިލަށް ހުށަހެޅީ އިސްލާހުތަކަށް ވޯޓަށް އަހަމުން ދަނިކޮށް ވަކި ހިސާބަމުން ސިސްޓަކަށް މައްސަލަ ކުރިމަތިވިއެވެ. އެކަމުގެ ސަބަބުން ދެ ފަހަރެއްގެ މަތިން ސިސްޓަން ރަނގަޅުކޮށް އަލުން ވޯޓަށް އަަހަން ފެށުމުންވެސް ސިސްޓަމް ރަނގަޅު ނުވެގެން ކޮމިޓީ ބައްދަލުވުން މެދު ކަނޑުއްވައި ލެއްވިއެވެ.
މަޖިލިސް ރައީސް ވިދާޅުވީ، 15 މިނިޓަށްފަހު 2:00 ގައި ކޮމިޓީ ބައްދަލުވުން ފަށައި ވޯޓަށް އައްސަވާނެ ކަމަށެވެ. ނަަމވެސް 2:00 ގައި ކޮމިޓީ ބައްދަލުވުން ފެށި ނަމަވެސް ސިސްޓަމް ރަނގަޅު ނުވެގެން މަޖިލިސް ރައީސް ނިންމެވީ ކޮންމެ މެންބަރެއްގެ ގާތުގައި އައްސަވައިގެން ވޯޓަށް އެއްސެވުމަށެވެ. ބާކީ ހުރި އިސްލާހުތަކަށް ވޯޓަށް އެއްސެވުން ކުރިއަށް ގެންދިޔައީ އެގޮތަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅި މި ބިލްގެ އިބްތިދާއީ ބަހުސް ނިމުމުން މި ބިލް މަޖިލީހަށް ބަލައިގަތީ، ޖަލްސާގައި ތިއްބެވި 82 މެންބަރުންގެ ތެރެއިން ވޯޓު ދެއްވި 69 މެންބަރުން އަގުލަބިއްޔަތުންނެވެ. ބިލް ބަލައި ނުގަތުމަށް 12 މެންބަރުން ވޯޓު ދެއްވިއެވެ.
މިއަދުން މިއަދަށް ނިންމަން އަމާޒު ކޮށްގެން ކުރިއަށް ގެންދާ މި ބިލް މުޅި މަޖިލީހުގެ ކޮމިޓީއަށް ފޮނުވަން ހުށަހެޅުއްވީ މަޖިލީހުގެ ދިއްގަރު ދާއިރާގެ މެންބަރު އަހުމަދު ނާޒިމެވެ. ތާއީދު ކުރެއްވީ އިނގުރައިދޫ ދާއިރާގެ މެންބަރު އިބްރާހިމް ފަލާހުއެވެ.
މުޅި މަޖިލީހުގެ ކޮމިޓީއަށް މި ބިލް ފޮނުވީ އެވަގުތު ޖަލްސާގައި ތިއްބެވި 84 މެނބަރުންގެ ތެރެއިން ވޯޓު ދެއްވި 71 މެންބަރުންގެ އަގުލަބިއްޔަތުންނެވެ. ބިލް މުޅި މަޖިލީހުގެ ކޮމިޓީއަށް ފޮނުވަން ނުފެންނަ ކަމަށް 12 މެންބަރުން ވޯޓު ދެއްވިއެވެ.
ސަރުކާރުގެ ފަރާތުން ރައްޔިތުންގެ މަޖިލީހުގެ މިއަދުގެ ޖަލްސާއަށް މި ބިލް ހުށަހެޅުއްވީ، ހުޅުދޫ ދާއިރާގެ މެންބަރު މުހައްމަދު ޝާހިދެވެ.
ޝާހިދު ހުށަހެޅުއްވި އިސްލާހުގައި ވަނީ، ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު، އެމީހަކު އިންތިހާބުވި ދައުރުގެ ތެރޭގައި އެ ސިޔާސީ ޕާޓީއަކުން އަމިއްލަ އަށް ވަކިވެއްޖެ ނަމަ ނުވަތަ ޕާޓީން ވަކި ކޮށްފި ނަމަ ނުވަތަ އެހެން ސިޔާސީ ޕާޓީއެއްގެ މެންބަރަކަށް ވެއްޖެ ނަމަ އެ މީހަކު މަޖިލިހުގެ މެންބަރުކަމުން ވަކިވާނެ ކަމަށެވެ.
މެންބަރަކު މިހާރު ތަމްސީލް ކުރާ ސިޔާސީ ޕާޓީން އަމިއްލަ އަށް ވަކިވެއްޖެ ނަމަ ނުވަތަ ވަކި ކޮށްފި ނަމަ ނުވަތަ އެހެން ޕާޓީއަކާ ގުޅުމުން ވެސް ގޮނޑި ގެއްލޭނެ ކަމަށް މި އިސްލާހުގައި ބުނެފައިވެއެވެ.
މީގެ އިތުރުން އަމިއްލަ ގޮތުން ވާދަކޮށްގެން މަޖިލީހަށް އިންތިހާބުވާ މެންބަރަކު ސިޔާސީ ޕާޓީއަކާ ގުޅިވަޑައި ގަތުމަކީ ވެސް މެންބަރުގެ ގޮނޑި ގެއްލޭނެ ކަމަށް ޝާހިދު ހުށަހެޅުއްވި އިސްލާހުގައި ބަޔާންކޮށްފައިވެއެވެ.
ގާނޫނު އަސާސީއަށް މި އިސްލާހު ގެންނަން ހުށަހަޅާފައިވާ އިރު، އެންޓި ޑިފެކްޝަންގެ ގާނޫނަށް މިދިޔަ 19 ވަނަ މަޖިލީހުގައިވެސް އެ ބަދަލު ވަނީ ގެނެސްފައެވެ.
އެ ގާނޫނުގައި ތިން ހާލަތެއް މެދުވެރިވެއްޖެ ނަމަ އެ މެންބަރަކު ހަތް ދުވަސް ތެރޭގައި ޕާޓީން އަމިއްލަ އަށް އިސްތިއުފާ ދޭން ޖެހޭނެއެވެ.
ނަމަވެސް އިސްތިއުފާ ނުދީފި ނަމަ ދެން ވާނެގޮތެއް އެ ގާނޫނުގައި ބުނެފައެއް ނުވެއެވެ. އެ މައްސަލަ މިހާރު ވަނީ އަމިއްލަ ފަރާތަކުން ކޯޓަށް ހުށަހަޅައިފައެވެ.
