ޤާނޫނުއަސާސީއަށް އެއްވެސް ބަދަލެއް ގެންނަން ވާނީ އެ ގެންނަ އިސްލާޙަކާމެދު ފުރިހަމައަށް ބަހުސް ކުރުމަށްފަހު ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

މަޖިލީހުގެ މެމްބަރުކަން އެތައް އަހަރު ކުރައްވައި، އަދި މަޖިލީހުގެ ރައީސްކަންވެސް ކުރައްވާފައިވާ ޝާހިދު ވިދާޅުވީ ޤާނޫނުއަސާސީއަށް ގެންނަ އިސްލާޙަކާމެދު ބަހުސް ކުރުމަށްފަހު، އެ އިސްލާޙު ގެންނައިރު، ރައްޔިތުންނާވެސް މަޝްވަރާ ކުރަން ޖެހޭނެއެވެ. އަދި އެކަން އޮތްގޮތް ރައްޔިތުންނަށްވެސް ސާފުވާން ޖެހޭނެއެވެ.

"ޤާނޫނު އަސާސީއަށް ބަދަލު ގެނައުމަކީ ސިއްރު ސިއްރުން އަވަސް އަރުވާލައިގެން ކުރާޒާތުގެ ކަމެއްނޫން" ޝާހިދު ވިދާޅުވިއެވެ.

ޝާހިދު ވިދާޅުވީ، ޤާނޫނުއަސާސީއަށް އިސްލާޙު ގެނައުމުގެ ކަންކަން ކުއްލިއަކަށް ކުރުމަށް އުޅެނީ ނުބައި ނިޔަތެއްގައި ކަމަށެވެ.

‏ "އެމަގުންކަން ކުރަނީ ނުބައިނިޔަތެއްގައި ކުރާކަމެއްވީމާ" ޝާހިދު ވިދާޅުވިއެވެ.

ޝާހިދު މިފަދައިން ވިދާޅުވީ، ޤާނޫނޫއަސާސީއަށް އިސްލާޙުތަކެއް ގެނަން ނިންމައި، ޕީއެންސީގެ ފަރާތުން ޤާނޫނުއަސާސީއަށް އިސްލާޙުތަކެއް ހުށަހަޅަން ނިންމާފައި ވަނިކޮށެވެ.

ރައްޔިތުންގެ މަޖިލީހަށް މެންބަރު އިންތިހާބުވާ ޕާޓީނޫން އެހެން ޕާޓީއަކަށް ބަދަލުވެއްޖެ ނަމަ، އެ މެންބަރެއްގެ ގޮޑި ގެއްލޭ ގޮތަށް ގާނޫނުއަސާސީއަށް ގެންނަ އިސްލާހުތަކެއް ހިމެނޭ ގޮތަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ބިލު މިއަދު އޮންނަ ޖަލްސާއަށް ވަނީ އެޖެންޑާވެސް ކޮށްފައެވެ.

މަޖިލީހުގެ މިއަދުގެ އެޖެންޑާގައި އެ ބިލުގެ ފުރަތަމަ ކިޔުމާއި އިބްތިދާއީ ބަހުސް ވެސް  ވަނީ އެޖެންޑާ ކޮށްފައެވެ.

އެނގިފައިވާ ގޮތުގައި ޕީއެންސީގެ ޕީޖީ ގްރޫޕުން މަސައްކަތް ކުރަނީ މިއަދުގެ ޖަލްސާގައި ގާނޫނުއަސާސީއަށް ގެންނަ އިސްލާހުތައް ފާސް ކުރުމަށެވެ. ސަރުކާރުގެ ފަރާތުން ޖުމްލަ ހަތަރު އިސްލާހެއް ގާނޫނުއަސާސީއަށް ގެނައުމަށް ވަނީ ނިންމައިފައެވެ.  އެގޮތުން ފުރަތަމަ ހިމަނާފައިވަނީ ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ ތިންބައިކުޅަ ދެބައިގެ ރުހުން ހޯދަން ޖެހޭ ގޮތަށް ހެދުމެވެ.

ބިލުގައި ހިމެނޭ މައިގަނޑު ކަންކަން:

1- މަޖިލިސް މެންބަރުންގެ ގޮނޑި ގެއްލުން:

މި އިސްލާހުގެ ދަށުން މަޖިލިސް މެންބަރުންގެ ގޮނޑި ގެއްލޭނެ ކަމަށް ހިމަނާފައިވަނީ އާ ދެ ހާލަތެކެވެ.

އެއީ އިންތިހާބުވާ މެންބަރަކު މަޖިލީހުގެ އުމުރުގެ ތެރޭގައި އެހެން ސިޔާސީ ޕާޓީއަކަށް ބަދަލުވުން، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއި ކުރުުމެވެ.

2- ރައީސަށް އިތުރު ބާރެއް:

މި ބިލުގައި ދެން ހުށަހަޅާފައިވަނީ ގާނޫނު އަސާސީގައި ރައީސުލްޖުމްހުރިއްޔާއަށް ލިބިދޭ ބާރު ތަކުގެ ތެރެއަށް މާއްދާއެއް އިތުރު ކުރުމެވެ.

އެގޮތުން ރައީސަށް އަލަށް ދޭ ބާރަކީ ދައުލަތުގެ މައިގަނޑު ސިޔާސަތުތައް ކަނޑައަޅާ އެ ސިޔާސަތުތައް ސަރުކާރުގެ ކަމާބެހޭ އިދާރާތަކާއި މުއައްސަސާތަކަށް އަންގައި، އެ ތަންތަނަށް ބޭނުންވާ އިރުޝާދު ދިނުމުގެ އިތުރުން، ގައުމީ ތަރައްގީގެ ޕްލޭންތަކާއި ތަސައްވަރުތައް އެކަށައެޅުމެވެ.

3- އަސްކަރީ ބޭނުމަށް ބޭރުގެ ސިފައިން ތިބުން:

ގާނޫނު އަސާސީއަށް އިތުރުކުރާ މި މާއްދާގެ ދަށުން ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ އަގުލަބިއްޔަތު ލިބިގެންނެވެ. ނަމަވެސް، އަސްކަރީ ނޫން ހަރަކާތްތަކުގައި އަދި އެއްބަސްވުންތަކުގެ ދަށުން ހިންގާ ތަމްރީނުތަކުގައި ރާއްޖޭގައި ބޭރުގެ ސިފައިންނަށް ހަރަކާތްތެރިވެވޭނެ އެވެ.