މިއަންނަ އަހަރުން ފެށިގެން މުއާސަލާތީ ހިދުމަތް ދޭ ފަރާތްތަކުގެ އަތުން ފީއެއް ނަގަން ނިންމައިފި އެވެ.
ސަރުކާރުން ވަނީ އެކަން އެގޮތަށް ކުރުމަށް ނިންމައިފައިވާ ކަމަށް އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި 55.6 ބިލިއަން ރުފިޔާގެ ބަޖެޓުގައި ބަޔާންކޮށްފަ އެވެ.
އެ ބަޖެޓުގައި ދައުލަތުގެ ފިސްކަލް އަދި ދަރަނީގެ ދެމެހެއްޓެނިވިކަން އިއާދަކޮށް، ބޭރުގެ ފައިސާއިން ސަރުކާރުން ކުރަން ޖެހޭ ހަރަދުތައް ކުރުމުގެ ގާބިލްކަންް އިތުރުކުރުމަށް ޑޮލަރުން ލިބޭ އާމްދަނީ އިތުރު ކުރަން ސިޔާސަތުތަކެއް ވަނީ ހިމަނައިފައެވެ.
އެގޮތުން ރާއްޖޭގެ ރޭޑިއޯ ފްރިކުއެންސީ ސްޕެކްޓްރަމް ހަރުދަނާކަމާ އެކު ބެލެހެއްޓުމަށް ފްރިކުއެންސީ ސްޕެކްޓްރަމް ޗާޖެއް ނެގުމަށް ހިމަނާފައިވެއެވެ.
އެކަން ކުރާނީ އެކަމާ ގުޅޭ ގާނޫނާއި ގަވާއިދުތަކަށް ބަދަލު ގެނެސްގެންނެވެ.
ނަމަވެސް އެ ފީ ނަގައިގެން ދައުލަތަށް ކިހާ ވަރެއްގެ އާމްދަނީއެއް ލިބޭނެ ކަމެއް ބުނެފައެއް ނުވެއެވެ.
