ރައްޔިތުންގެ މަޖިލީހަށް މިހާރު ހުށަހަޅާފައިވާ ބަޖެޓަށް ވޯޓުވެސް ނުދެއްވާނެ ކަމަށް ވިދާޅުވެ، ބަޖެޓް އަނބުރާ ގެންދިޔުމަށް ދ. މީދޫ ދާއިރާގެ މެމްބަރު އަދި އެމްޑީއޭގެ ލީޑަރު އަޙްމަދު ޝިޔާމް ސަރުކާރަށް ގޮވާލައިފިއެވެ.
ސިޔާމް ވިދާޅުވީ، މިފަހަރު މަޖިލީހަށް ހުށަހަޅާފައިވާ ބަޖެޓަކީ އެއްވެސް ތަފްސީލެއް ނެތް ބަޖެޓެއް ކަމަށެވެ. ބަޖެޓްގައި ދާއިރާ ތަކަށް ހިމަނާފައިވާ ކަންތައްތައް ހިމަނާފައި ނުވާތީ މެންބަރުން ނިސްބަތްވެ ވަޑައިގަންނަވާ ދާއިރާތަކުގެ ތަރައްގީއަށް އޮތީ ކޮންކަމެއްކަން ނޭނގޭ ކަމަށްވެސް ވިދާޅުވިއެވެ.
ސިޔާމު ވިދާޅުވީ، މަޖިލިސް މެންބަރުންނަކީ ރައްޔިތުން އެ މީހުންގެ ދާއިރާތަކުގެ ތަރައްގީއަށް މަސައްކަތް ކޮށްދީ، ރައްިޔތުން އެދޭގޮތަށް މަޖިލީހުގައި ވަކާލާތު ކޮށްދިނުމަށް ރައްޔިތުން އިންތިޚާބު ކޮށްފައިވާ ބައެއް ކަމަށެވެ. މަޖިލިސް މެންބަރުން ހުވާ ކުރއްވާފައި ވަނީވެސް އެގޮތަށް ކަންތައް ކުރުމަށް ކަމަށްވެސް ވިދާޅުވިއެވެ.
އެހެން ކަމުން އެ ތަފްސީލުތައް ނެތި ބަޖެޓަށް ވާހަކަ ދައްކާނެ ގޮތެއް އެނގިނުލައްވާ ކަމަށްވެސް ޝިޔާމް ވިދާޅުވިއެވެ.
"މަޖިލީހުގައި މިވީ 21 އަހރުގެ ތެރޭގައި ތަފްސީލެއް ނެތް ބަޖެޓެއް ހުށަހެޅުނު ފުރަތަމަ ފަހަރު މިއީ،" ޝިޔާމް ވިދާޅުވެއްޖެއެވެ.
ސިޔާމު ވަނީ ބަޖެޓް އަނބުރާ ގެންގޮސް ތަފްސީލު ތަކާއެކު އަލުން ހުށަހެޅުމަށް ސަރުކާރަށް ގޮވާލައްވާފައެވެ.
ސިޔާމުގެ ވާހަކަތައް ނިމުމުން، މަޖިލީހުގެ ރައީސް ވިދާޅުވީ، މަޖިލީހަށް ހުށަހަޅާ ބިލުތަކާ އެއްޗެހި އަނބުރާ ގެންދިއުމަކީ މަޖިލިސް ރައީސަށް އޮތް ބާރެއް ނޫން ކަމަށެވެ. އަދި އެބާރު އޮންނަނީ މަޖިލިސް މެންބަރުންގެ އަތުގައި ކަމަށްވެސް މަޖިލިސް ރައީސް ވިދާޅުވިއެވެ.
