ޕީޕީއެމް، ޕީއެންސީން 2018 ވަނަ އަހަރު ރާއްޖޭގެ ވެރިކަމަށް އައުމުގައި މައިގަނޑު ވިސްނުމަކަށް ހެދީ، ދުނިޔޭގެ އެއްގައުމު އަނެއްގައުމާ ތޮޅުވައިގެން، ގައުމުގައި ފިތުނަ އުފައްދައިގެން ވެރިކަން ހޯދުން ކަމަށް އެމްޑީޕީގެ ރައީސް އަދި ކުރީގެ ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
މިހާރުގެ ސަރުކާރަށް 1 އަހަރުވުމާއި ގުޅިގެން ރާއްޖެ ޓީވީ އިން ކުރިޔަށްގެންދިޔަ ޕްރޮގްރާމެއްގައި ވާހަކަ ދައްކަވަމުން ޝާހިދު ވިދާޅުވީ، މި ސަރުކާރު އައުމުގެ ކުރިން ފިކުރަކަށް ހެދީ އެއްގައުމުގެ މަގްބޫލުކަން ހޯދުމަށް ވިސްނައި، އަނެއް ގައުމަކަށް ކުޑައިމީސް ބަސް ބުނުން ކަމަށެވެ.
"އެ ގައުމުގެ ވެރިންނާ ދިމާލަށް ހިތުހުރިހާ އެއްޗެއް ވިދާޅުވެ، މާލި ހައްދައިގެން ނެރެ މަގުމަތީގައި ދަމާ، އެ ހުރިހާ ސަކަރާތެއް ޖެހީމަ ދެންވާނެ ގޮތަކީ އިތުބާރު ގެއްލިގެންދާނެ ހުރިހާ ގައުމެއްގެ ކުރިމަތީގަ. ހަމައެކަނި އަޅުގަނޑުމެންގެ އަވައްޓެރި ގައުމުތަކުގެ ކުރިމައްޗަކުނޫން ސަރުކާރުގެ އިތުބާރު ގެއްލިގެން ގޮސްފައި ވަނީ. ދުނިޔޭގެ ހުރިހާ ގައުމަކުންވެސް މި ސަރުކާރާދޭތެރޭ ދެކެމުން ދަނީ މި ސަރުކާރުގެ ވެރިންނަކީ އަދި އައިސް އެހެން ވާހަކައެއް ދައްކާލިޔަސް އެތެރެ ނުބައި، ހަސީލަތް ގޯސް، އިތުބާރު ނުކުރެވޭ ބަޔެއްގެ ގޮތުގައި" ޝާހިދު ވިދާޅުވިއެވެ.
ޝާހިދު ވިދާޅުވީ މި ސަރުކާރުގެ ވެރިން ޚާރިޖީ ގޮތުން ހެއްދެވި އެންމެ ބޮޑު ގޯހަކީ ވެރިކަމަށް އައުމުގެ ޝައުގުވެރިކަން ހުރެވެސް، އިންޑިޔާ ފަދަ ގައުމަކާ ދެކޮޅަށް މަގުމަތީގައި ހިންގި ހަރަކާތްތައް ކަމަށެވެ. އެ އަމަލަކީ ވެރިކަމަށް ވަޑައިގަންނަވަން ބޭނުން ބަޔަކު ކޮށްގެންނުވާނެ ކަމެއް ކަމުގައި ޝާހިދު ވިދާޅުވިއެވެ. އަދި އޭގެސަބަބުން ޚާރިޖީ ގޮތުން ރާއްޖެއަށް ގިނަ ގެއްލުންތަކެއް ވެގެން ގޮސްފި ކަމަށް ވިދާޅުވިއެވެ.
ޝާހިދު ވިދާޅުވީ އޭރު ޗާގޯސް ވާހަކަ އިދިކޮޅުން ދެއްކީވެސް ރާއްޖޭގައި ސިޔާސީ ގޮތުން ބޮޑު ފިތުނައެއް އުފައްދުމުގެ ބޭނުމުގައި ދެއްކި ވާހަކައެއް ކަމަށެވެ. އެގޮތުން ދިވެހިރާއްޖެ އިސްލާމްވީ ދުވަހުން ފެށިގެން މިއަދާ ހަމައަށް އައިއިރު ރާއްޖޭގެ އެންމެމަތީވެރިޔާގެ މަގާމުގު އަދާކުރައްވަމުން ގެންދެވި ބޭފުޅުންގެ ތެރެއިން، ރައީސް ޑރ. މުއިއްޒަކީ 102 ވަނަ ވެރިޔާ ކަމަށްވާއިރު، އެ 102 ބޭފުޅުންގެ ތެރެއިން އެންމެ ބޭފުޅަކުވެސް ވެރިކަމުގައި ހުންނެވިއިރު، ޗާގޯސްއަކީ ދިވެހިރާއްޖޭގެ ބަޔެއް ކަމަށް ވިދާޅުވެފައި ނެތް ކަމަށް ޝާހިދު ވިދާޅުވިއެވެ.
"ދެން ބަޔެއް ބޭފުޅުން އެބަދައްކަވާ 9 ވަނަ ހަސަން ރަސްގެފާނުގެ ވާހަކަ. 9 ވަނަ ހަސަން ރަސްގެފާނު އިސްލާމްދީން ދޫކުރައްވައި، ކްރިސްޓިއަންދީނަށް ބަދަލުވެގެން ގޯވާގައި ހުންނަވައިގެން ލިޔުއްވި ލިޔުމެއްގައި އެހެން އޮންނަ ވާހަކައަށް ބަޔެއް ބޭފުޅުން އެބަ ރިއާޔަތް ކުރައްވާ. އެކަމަކު ދިވެހި ސަރުކާރެއް، ދިވެހި ވެރިޔަކު ދުވަހަކުވެސް ވިދާޅުވެފައެއްނުވޭ" ޝާހިދު ވިދާޅުވިއެވެ.
