ކުރީގެ ސަރުކާރުން ދޫކޮށްފައިވާ ގޯތިތަކާއި ފްލެޓްތައް ނުދޭން ވެގެން މި ސަރުކާރުން އުޒުރު ދައްކަމުން އަންނަ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
އާޒިމް އެކްސްގައި ވިދާޅުވީ ބޯހިޔާވަހި ކަމަކީ އިންސާނާ ދިރިއުޅުމަށްޓަކައި ބޭނުންވާ އަސާސީ ހައްޤެއް ކަމަށެވެ. އަދި އެމްޑިޕީގެ ސަރުކާރުގައި މާލޭގެ ބޯހިޔާވަހި ކަމަށް ހައްލެއް ހޯދައިދޭން މަސައްކަތް ފަށައިގެން، ކުރިޔަށް ގެންގޮސްފައި ކަމަށެވެ.
"ރައްޔިތުންނަށް ހަމަޖައްސައި ދީފައިވާ، ފްލެޓުތަކާއި ކަނޑާދީފައިވާ ގޯތިތައް އަދިވެސް ހައްޤުވެރިންނާއި ހަވާލު ނުކުރާތީ ހިތާމަ ކުރަން. މިހާރުގެ ސަރުކާރުން މިދަނީ މިކަން ނުކުރާން ވެގެން، އެކިއެކި އުޒުރުތައް ދަށްކަމުން" އާޒިމް ވިދާޅުވިއެވެ.
އާޒިމް ވިދާޅުވީ، ރައްޔިތު މީހާއަށް ދިނުމަށް ނިންމާފައި ހުރި ފުލެޓާއި ގޯތިތައް ހައްޤުވެރިންނަށް، ހަވާލު ކުރަމަކީ ސަރުކާރަށް ލާޒިމު ކަމެއް ކަމަށް މުޅި ޤައުމު ޤަބޫލުކުރާ ކަމަށެވެ.
"މާލޭ ރައްޔިތުންގެ ހައްޤު ނިގުޅައިގަނެގެން، ލިބޭނެ އެއްވެސް މަންފާއެއް ނޯންނާނެ. ގޯއްޗާއި ފްލެޓް މާލޭގެ ރައްޔިތުންނަށް ހަވާލުކޮށް މިމަސައްކަތް މިއަހަރު ހުސްވުމުގެ ކުރިން ނިންމައި ދިނުމަށް ސަރުކާރަށް ގޮވާލަން" އާޒިމް ވިދާޅުވިއެވެ.
ކުރީގެ ސަރުކާރުން ކުރިޔަށް ގެންދިޔަ ބޯހިޔާވަހި ކަމުގެ ޕްރޮޖެކްޓްގެ ދަށުން ގެންދިޔަ ފްލެޓާއި ގޯތިތައް ދޭން މީހުންގެ ދާއިމީ ލިސްޓުވެސް ވެރިކަން ބަދަލުވީއިރު ވަނީ ނެރެފައެވެ. ނަމަވެސް މި ސަރުކާރުން އަލުން އެ ލިސްޓުތައް އިތުރަށް ބަލަމުންދާ ކަމަށް ވަނީ ބުނެފައެވެ. މިވަގުތު އެ ލިސްޓު ނެރުން ވަނީ ވަކިމުއްދަތެއް ނެތްގޮތަށް ފަސްކޮށްފައެވެ.
