މޯލްޑިވްސް މީޑިޔާ ކައުންސިލާއި، މޯލްޑިވްސް ބްރޯޑްކާސްޓިންގ ކޮމިޝަން އެއްކޮށްލައިގެން އަލަށް އަލަށް އުފައްދަން ފަރުމާކޮށް މަޖިލީހަށް ވައްދާފައިވާ މީޑިޔާ ކޮމިޝަނުގެ ބިލު މަޖިލިސް ތަޅުމުން ބޭރުކޮށްދޭނެ ކަމުގައި ރައީސުލްޖުމްހޫރިއްޔާ ޑރ. މުޙަންމަދު މުއިއްޒު ވިދާޅުވެއްޖެއެވެ.

ސަރުކާރަށް އެއް އަހަރު ފުރުން ފާހަގަ ކުރުމަށް ރޭ ސޯޝަލް ސެންޓަރުގައި ބޭއްވި ހަފްލާއެއްގައި ވާހަކަ ދައްކަވަމުން ރައީސް ވިދާޅުވީ އަމިއްލަ މެމްބަރެއް ކަމުގައިވާ ތުޅާދޫ ދާއިރާގެ މެމްބަރު އަބްދުލްހަންނާނު އަބޫބަކުރު މަޖިލީހަށް ވައްދާފައިވާ މީޑިޔާ ބިލު ސަރުކާރުގެ މެޖޯރިޓީ އޮތް ޕީއެންސީގެ މެމްބަރުންގެ ތާއީދާއެކު ބޭރުކޮށްދޭނެ ކަމަށެވެ.

މީޑީޔާ ބިލުގައި މީޑިޔާތަކުގެ ކޮންޓްރޯލް އިންތިހާއަށް ސަރުކާރަށް ނެގޭގޮތަށް އޮތް މި ބިލާބެހޭގޮތުން ރައީސް ވިދާޅުވީ މީޑިޔާ ކޮންޓްރޯލް ކުރުމަކީ އެމަނިކުފާނުގެ ގަބޫލުކުރައްވާ ސިޔާސަތެއްނޫން ކަމަށެވެ. އަދި މީޑިޔާތައް ކޮންޓްރޯލް ކުރާހިތްޕުޅު ނެތް ކަމަށެވެ.

ރައީސް ވިދާޅުވީ ބޭނުންފުޅުވަނީ މީޑިޔާތައް ބާރުވެރި ކުރުވަން ކަމަށެވެ. އެގޮތުން އަންނަ އަހަރަށް ލަފާކޮށް ފާސްކުރާ ބަޖެޓުގައި ދައުލަތުގެ ބަޖެޓުން މީޑީޔާ ތަކަށް ފައިސާދޭން ހިމަނާފައިވާނެ ކަމަށް ވިދާޅުވިއެވެ. އަދި މީޑިޔާ ތަކަށް ހެޔޮއަގުގައި އޮފީސް އިމާރާތް ހުޅުމާލެއިން ލިބޭނެ ފުރުޞަތުވެސް ހަމަޖައްސަވާނެ ކަމަށް ވިދާޅުވިއެވެ.

އެ ބައްދަލުވުމަށްފަހު ބޭރަށް ނުކުމެވަޑައިގަތުމުން ބަޔެއް ނޫސްވެރިން ވަނީ އެ ބިލާބެހޭގޮތުން އިތުރަށް ރައީސަށް ސުވާލު ދަންނަވާފައެވެ. ރައީސް ނޫސްވެރިންގެ ގާތުގައިވެސް ވިދާޅުވީ އެ ބިލު ބޭރުކޮށްދެއްވާނެ ކަމަށެވެ.

މީޑިޔާ ކޮމިޝަންގެ ބިލުގައި ނޫސްވެރިކަމުގެ މިނިވަންކަން ގެއްލޭނެ ގޮތަށް ހުރުމުން ނޫސްތަކާއި ނޫސްވެރިންނާއި ނޫސްވެރިކަމުގެ ޖަމްއިއްޔާތަކާއި މީޑިޔާ ކައުންސިލުންވެސް ވަނީ އެކަމާމެދު ކަންބޮޑުވުން ފާޅުކޮށްފައެވެ.

މީޑިޔާތަކުގެ އެންމެ ބޮޑު ކަންބޮޑުވުމެއް އެކަމުގައި އޮތީ ދެކޮމިޝަން އުވާލުމަށްފަހު އަލަށްހަދާ ކޮމިޝަނުގައި ސަރުކާރަށް މެޖޯރިޓީ އޮންނަހެން ކޮމިޝަނުގެ މެމްބަރުން ނެގުމަށް އޮތުމެވެ. އެގޮތުން

ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހުން ކަމަށް ބިލުގައި އޮތެވެ. އަދި އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

މީގެއިތުރުން މީޑިއާ ތަކުން އަމަލު ކުރަންޖެހޭ ސުލޫކީ މިންގަނޑާ ތަކުރާރުކޮށް ޚިލާފު ވާފަރާތްތައް، 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ވެއެވ. ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ވެއެވެ.