މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޮޑްކާސްޓިން ކޮމިޝަން އުވާލައި، "މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން" ގެ ނަމުގައި އާ ކޮމިޝަނެއް އުފައްދަން ރައްޔިތުންގެ މަޖިލިހަށް މިހާރު ހުށަހަޅާފައިވާ ބިލުގެ ސަބަބުން، މިނިވަން ނޫސްވެރިިކަމުގެ ތެރެއަށް ނުފޫޒު ފޯރުވުމުގެ ފުރުސަތު ސަރުކާރަށް ލިބި، ނޫސްވެރި ކަމަށް ބިރުވެރިކަން ކުރިމަތިވާނެ ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.

މާރިޔާ އެކްސްގައި ކުރެއްވި ޕޯސްޓެއްގައި ވިދާޅުވީ ރައްޔިތުންގެ މަޖިލީހަށް ހުށަހަޅައިފައިވާ ބިލުގައިވަނީ މީޑިއާ ރެގިއުލޭޓް ކުރުމަށް ކަނޑައަޅައިފައިވާ އެމްއެމްސީގެ ރައީސްއާއި ނައިބު ރައީސްއަކީ ރައީސުލްޖުމްހޫރިއްޔާ ކަނޑައަޅުއްވާ ބޭފުޅުންގެ ގޮތުގައި ހަމަޖެއްސެވުމަށް ކަމަށެވެ.

އެ ބިލުގައި އެގޮތަށް ހިމަނައިފައިވުމުގެ ސަބަބުން ރާއްޖޭގެ މީޑިއާތައް ވަނީ ނުރައްކަލެއްގައި ކަމަށް މާރިޔާ ވިދާޅުވިއެވެ.

"މި ބލުގައިވާ ގޮތުން މީޑިއާ ރެގިއުލޭޓްކުރާ އިދާރާގެ މެޖޯރިޓީ މެންބަރުން އައްޔަންމިކުރަނީ ރައީސުލްޖުމްހޫރިއްޔާ. މީޑިއާތައް ބޮޑެތި އަދަދުތަކުން ޖޫރިމަނާކުރެވޭނެ. ރާއްޖޭގެ މީޑިއާތައް ވަނީ ނުރައްކަލުގައި" މާރިޔާ ވިދާޅުވި އެވެ.

އެ ބިލު މަޖިލީހަށް ހުށަހަޅުއްވާނީ، އަމިއްލަ މެންބަރެއް ކަމަށްވާ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރެވެ.

މި ބިލުގެ މަގުސަދުގެ ގޮތުގައި ބިލުގައި ހިމަނާފައިވަނީ، ރައްޖޭގައި ނޫސްވެރިކަމުގެ މިނިވަންކަން ކުރިއަރުގައި ތަރައްގީކޮށް، ޤާނޫނުއަސާސީން ނޫސްވެރިންނަށް ލިބިދޭ ހައްގުތައް، ޒިންމާދާރުކަމާއެކު ބޭނުން ކުރާކަން ކަށަވަރު ކުރުމުގެ ގޮތުން މީޑީޔާތަކާއި މީޑިޔާތަކުގައި މަސައްކަތްކުރާ ނޫސްވެރިންނާއި އެހެނިހެން ފަރާތްތަކުން އަމަލު ކުރާނެ ހަމަތަކާއި އުސޫލުތައް ކަނޑައެޅުން ކަމަށެވެ.

ބިލުގައި ބުނެފައިވަނީ މި ކޮމިޝަނުގައި 7 މެމްބަރުން ހިމެނޭނެ ކަމަށެވެ. އެއީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މެންބަރުންނާއި، މީޑިޔާ ތަކުން އިންތިޚާބުކުރާ 3 މެންބަރުންނެވެ. ރައީސުލްޖުމްހޫރިއްޔާ ކޮމިޝަނަށް އައްޔަން ކުރަން ފެންނަ ފަރާތް ތަކުގެ ނަންތައް މަޖިލީހަށް ފޮނުވައިގެން ރުހުން ހޯދަންޖެހޭނެ ކަމަށް ބިލުގައި ވަނީ ކަނޑައަޅައިފައެވެ.

ބިލުގައި ވާގޮތުން މީޑިޔާ ތަކުން ކޮމިޝަންގައި ހިމެނޭ މެންބަރުން އިންތިޚާބު ކުރާނީ މި ޤާނޫނޫނުގެ ދަށުން ހަދާ ގަވާއިދުގައި ވާގޮތުގެ މަތިން އިލެކްޝަން ކޮމިޝަނުން ބާއްވާ އިންތިޚާބަކުންނެވެ. މި އިންތިޚާބުގައި ވޯޓު ލެވޭނީ ބްރޯޑްކާސްޓް މީޑިޔާ ހިމެނޭނެހެން، ނޫސް މަޖައްލާ ފަދަ ތަކެތީގެ ޤާނޫނު އާއި ބްރޯޑްކާސްޓް ކުރުމުގެ ޤާނޫނުގެ ދަށުން ރާއްޖޭގައި ރަޖިސްތޓްީ ކޮށްފައިވާތާ 5 އަހަރު ވެފައިވާ ބްރޯޑްކާސްޓަރުންނާއި މީޑިޔާތަކާއި އެތަންތަނުުގައި މަސައްކަތްކުރާ ނޫސްވެރިންނަށެވެ.

ބިލުގައި ކަނޑައަޅާފައި ވާގޮތުގެ މަތިން ނޫސް ޝާއިއު ނުުރާތާ 12 މަސް ދުވަސް ވެފައިވާ ނޫސްތަކާއި، ރަޖިސްޓްރީ ކުރުމުގައި ކަމެއް އޮޅުވާލާފައިވާ ނޫސްތަކުގެ ރަޖިސްޓްރީ ބާތިލް ކުރެވޭނެއެވެ. އަދި ބްރޯޑްކާސްޓް ކުރުމުގެ ޚިދުމަތް ދިނުމުގެ ލައިސަންސް އޮތް ފަރާތަކުން މި ޤާނޫނާއި ސުލޫކީ މިންގަނޑާ ޚިލާފު ވެއްޖެނަމަ، ވޭތުވެދިޔަ އަހަރު އެ ފަރާތަށް ލިބުނު އާމްދަނީގެ 10 ޕަސެންޓަށްވުރެން ބޮޑުނޫން އަދަދަކުން އެ ފަރާތެއް ޖޫރިމަނާ ކުރެވޭނެއެވެ. އަދި ކޮމިޝނުން އަންގާ ގޮތަށް، ކުރި ކުށް، ރަނގަޅު ނުކޮށްފިނަމަ، އެ ފަރާތެއްގެ ޕްރޮގްރާމް ޝެޑިއުލްގެ ބައެެއް ވަގުތީ ގޮތުން މެދުކަނޑާލުމަށް އެންގުމާއި، އެތަނަކުން ފޮނުވާ ކޮންޓެންޓަކީ އިސްލާމްދީނާއި، ގައުމީ ސަލާމަތާއި، އާއްމު ނިޒާމު ނުވަތަ އާންމު ސިއްހަތަށް އޮތް ނުރައްކަލެއް ކަމަށް ބެލެވިދާނެ ހާލަތުގައި ދައުލަތުގެ ކަމާއިގުޅުން ހުރި އިދާރާތައް މެދުވެރިކޮށް އެ ކޮންޓެއްޓެއް ބްރޯޑްކާސްޓް ކުރުން ހުއްޓުވޭނެ ކަަމަށްވެސް ބިލުގައިވެެއެވެ.

މީގެއިތުރުން މަސައްކަތް ކުރުމަށް ބޭނުންކުރާ އާލާތްތައް ހިފެހެއްޓުމާއި، ކޯޓަށް ހުށަޅައިގެން ލައިސަންސް ބާތިލް ކުރުމާއި ހަމައަށް ފިޔަވަޅު އެޅުމަށްވެސް ބިލުގައި ހިމަނާފައިވެއެވެ.

ކޮމިޝަނުން ކަނޑައަޅާ ސުލޫކީ މިންގަނޑާ ތަކުރާރުކޮށް ހިލާފުވާނަމަ، އެ ނޫހުގެ ނުވަތަ މަޖައްލާއެއް، 5000، ރުފިޔާ އާއި 50،000 ރުފިޔާއާ ދެމެދުގެ އަދަދަކަށް ޖޫރިމަނާ ކުރުމާއި، މީޑީޔާގައި މަސައްކަތްކުރާ ފަރާތްތަކާއި ނޫސްވެރިންވެސް 5،000 ރުފިޔާ އާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭގ ޮތަށްވެސް ބިލުެގައި ހިމަނާފައިވެއެވެ.