ކުރީގެ ރައީސް އަބްދުﷲ ޔާމީން އަބްދުލްގަތްޔޫމް، ޖަލުން ގެއަށް ބަދަލު ކުރެއްވީ އަމިއްލަފުޅަށް ފެނިވަޑައިގެން ކަމަށާއި، އެކަން ކުރެއްވީ މިހާރުގެ ރައީސް ޑރ. މުއިއްޒުވެސް އަދި މަޖިލީހުގެ ރައީސް އަބްދުއްރަޙީމް އަބްދުﷲވެސް އެދިވަޑައިގެން ނޫން ކަމަށް ކުރީގެ ރައީސް އިބްރާހީމް މުޙަންމަދު ސޯލިހު ވިދާޅުވެއްޖެއެވެ.

ރާއްޖެ ޓީވީގައި މިއަދު ހެނދުނު ވާހަކަ ދައްކަވަމުން އިބޫ ވިދާޅުވީ، ރައީސް ޑރ. މުއިއްޒެއްވެސް އަދި މަޖިލީހުގެ ރައީސް އަބްދުއްރަޙީމްވެސް، ރައީސް ޔާމީން ގެއަށް ބަދަލުކޮށްދިނުމަށް އެދިފައިވެސް ނެތް ކަމަށެވެ. އަދި އެކަމާމެދު މަޝްވަރާވެސް ނުކުރައްވާ ކަމަށެވެ.

"އެއްވެސް ހާލެއްގައި ރައީސް ޑރ. މުއިއްޒު އެދިވަޑައިގަންނަވައިގެން އަދި މިހާރުގެ ރައްޔިތުންގެ މަޖިލީހުގެ ރައީސް އެދިވަޑައިގެން ކުރިކަމެއް ނޫން" އިބޫ ވިދާޅުވިއެވެ.

އިބޫ ވިދާޅުވީ، ރައީސް ޔާމީން މިނިވަންކުރުމާއިބެހޭ މެސެޖެއް ޑރ. މުއިއްޒުގެ ފަރާތުން ލިބިފައިވާ ކަމަށާއި، ނަމަވެސް އެ މެސެޖު ލިބުނީ ރިޔާސީ އިންތިޚާބުގެވެސް 1 އަހަރު ކުރިން ކަމަށް ވިދާޅުވިއެވެ. އެފަހުން އެފަދަ މެސެޖެއްވެސް ލިބިވަޑައިގެންފައި ނެތް ކަމަށް ވިދާޅުވިއެވެ.