ދަލާއި ލޭ އޮހޮރުވައިގެން ހޯދި ޚިޔާލު ފާޅުކުރުމާއި ނޫސްވެރިކަމުގެ މިނިވަންކަން އޮބަހައްޓައި ތަޅު އެޅުވޭ ގޮތަށް ސަރުކާރުގެ ފަރާތުން މަޖިލީހަށް ބިލެއް ހުށަހެޅުމަކީ އިންތިހާ އަށް ކަންބޮޑުވާ ކަމެއް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ، ރައީސުލްޖުމްހޫރިއްޔާ އައްޔަން ކުރައްވާ 4 މެމްބަރުންވެސް ހިމެނޭގޮތަށް މީޑިޔާ ކޮމިޝަނެއް އުފައްދަން މަޖިލީހަށް ހުށަހެޅި ބިލާގުޅިގެން ކަންބޮޑުވުން ފާޅުކޮށް، އެކްސްގައި މިއަދު ކުރެއްވި ޓްވީޓެއްގައެވެ.

ޝާޙިދު ވިދާޅުވީ، އެފަދަ ބިލެއް ހުށަހެޅީ، ވެރީންގެ ނާޤާބިލުކަމާއި ފަސާދައިގެ ޢަމަލުތައް ފަރުދާ ކުރަން ކަމަށްވެ. އަދި ކޮންމެ ދުވަހަކުވެސް މި ސަރުކާރުން ފެނިގެން މިދަނީ ޚުދުމުޚްތާރު ކަމުގެ ސިފަ ކަމަށްވެސް ޝާހިދު ވިދާޅުވިއެވެ.

"މޯލްޑިވްސް މީޑިޔާ އެންޑް ބްރޯޑްކާސްޓިން ކޮމިޝަން" އުފެއްދުމަށް ބިލު ހުށަހަޅާފައި ވަނީ ރައީސުލްޖުމްހޫރިއްޔާ އައްޔަންކުރައްވާ ހަތަރު މެންބަރުން ހިމެނޭގޮތަށެވެ. ދެން ހިމެނެނީ މީޑިޔާ ތަކުން އިންތިޚާބުކުރާ ތިން މެމްބަރުންނެވެ.