އަންނަ 2025 ވަނަ އަހަރަށް ބަޖެޓްގައި ކެންދޫ ދާއިރައަށް އެއްވެސް ކަމެއް ކޮށްދޭން ހިމަނާފައިނުވާ ކަމަށް ރައްޔިތުންގެ މަޖިލީހުގެ އިދިކޮޅު އެމްޑީޕީގެ ކެންދޫ ދާއިރާގެ މެންބަރު މައުރޫފު ޒާކިރު ވިދާލުވެއްޖެއެވެ.

ބަޖެޓް ބަހުސްގައި މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން މެންބަރު ވިދާޅުވީ، މަޖިލީހުގައި ހިމެނޭ ހުރިހާ ދާއިރާގެ ތަރައްގީއަށް ބަޖެޓްގައި ފައިސާ ހިމަނައިފިނަމަ، ބަޖެޓް 100 ބިލިޔަނަށް އަރާނެ ކަމަށެވެ.

"ކޮންމެ މެންބަރަކަށް ބަޖެޓްގައި ޖަހާފައިވާ ދެ ބިިލިޔަން ރުފިޔާ ދައްކާފައި މި ބުނަނީ މިއޮތިއްޔެއްނޫންހޭ ތިޔަ މެންބަރުންގެ ދައިރާއަށް ކަނޑައަޅާފައިވާ ފައިސާ އަކީ،" މައުރޫފް ވިދާޅުވިއެވެ.

މައުރޫފް ވިދާޅުވީ، ކަނޑައަޅައި ދާއިރާއަށް ކޮށްދޭނެކަމެއް ކަނޑައަޅައި ބަޖެޓްގައި ހިމެނާފައިނުވާތީ، މި ބަޖެޓް ވެގެންމިދަނީ، ދާއިރާގެ ކަންތައްތަކަށް ރައިސްގެ ފައިންޕުޅުގައި އާދޭސް ކުރަން މަޖުބޫރު ބަޖެޓަކަށް ކަމަށެވެ. އަދި އެކަމަށް އެދި މިނިސްޓަރުންގެ ފަހަތުން މެންބަރުން އާދޭސް ކުރަން، ސަލާން ޖަހަންޖެހޭ ބަޖެޓެއް ކަމަށްވެސް ވިދާޅުވިއެވެ.

ދާއިރާގެ ރަށްރަށުގައި ހުރި މައްސަލަ ތަކުގެ ތެރެއިން، އެ ދާއިރާގެ ރަށަރަށަށް ދިމާވެފައިވާ ބޯހިޔާވަހިކަމާއި، ރަށްގިރުމާއި، ބަނދަރުތަކާއި، ނަރުދަމާގެ ނިޒާމުގެ މައްސަލަތައް މެމްބަރު ވަނީ ފާހަގަ ކުރައްވާފައެވެ.

މައުރޫފް ވިދާޅުވީ، މި ބަޖެޓަކީ ފިކުރަށް ބަލައި ދާއިރާ ބިކަކޮށްލާނެ ފުރަތަމަ ބަޖެޓް ކަމަށެވެ. އެގޮތުން އިދިކޮޅު އެމްޑީޕީގެ މެންބަރެއް ދާއިރާގެ ރައްޔިތުން ހޮވާފައިވާތި އެ ދާއިރާއަށް ބަޖެޓްގައި އެއްވެސް ކަމެއް ނެތް ކަަމަށްވެސް ވިދާޅުވިއެވެ.

އޭނާވަނީ ފިކުރަށް ބަލައިގެން ތަފާތު ކުރުންތައް ނުގެންގުޅެން އަންނަ އަހަރަށް ހުށަހަޅާފައިވާ ބަޖެޓުން ހަމަހަމަ ކަމާއެކު ހުރިހާ ދާއިރާއެއްގެ ރައްޔިތުންގެ ކަންބޮޑުވުންތައް ހައްލު ކޮށްދިނުމަށް ސަރުކާރަށް ގޮވާލައިފައެވެ.

އޭނާ ވިދާޅުވީ، ކެންދޫ ދާއިރާއަށް އެމްޑީޕީ މެންބަރެއްގެ ގޮތުގައި އިންތިހާބު ކޮށްދިނީތީ ދާއިރާގެ ރައްޔިރުންނަށް ޝުކުރުވެރިވާ ކަމަށެވެ. ނަމަވެސް ސަރުކާރާ ފިކުރު ތަފާތު މެންބަރަަކަށްވާތީ ދާއިރާއަށް ސަރުކާރުން ކަމެއް ކޮށްނުދޭ މައްސަލައިގައި ދާއިރާގެ ރައްޔިތުން އެދޭނަމަ މަޖިލިސް މެންބަރުކަމުން އިސްތިއުފާ ދޭން ތައްޔާރަށް ހުރި ކަމަށެވެ.