ކުރީގެ ރައީސް އިބްރާހީމް މުޙަންމަދު ސޯލިހުގެ ވެރިކަމުގައި ކުރިޔަށް ގެންދިޔަ "ގެދޮރުވެރިޔާ" ޕްރޮޖެކްޓްގެ ދަށުން ދޫކޮށްފައިވާ 4000 ފްލެޓްގެ ހައްގުވެރިން ކަނޑައަޅައި، މިއަހަރު ނިމުމުގެ ކުރިން އެ ފްލެޓްތައް އެ ފަރާތްތަކާ ހަވާލު ކުރައްވާނެ ކަމުގައި ހައުސިންގ މިނިސްޓަރު އަލީ ހައިދަރު ރޭ ވިދާޅުވެއްޖެއެވެ.
ދައުލަތުގެ މީޑިޔާ "ޕީއެސްއެމް" ގައި ރޭ ވާހަކަ ދައްކަވަމުން ހައިދަރު ވިދާޅުވީ މިހާރު ކުރިޔަށް ދަނީ ކުރީގެ ސަރުކާރުން ފްލެޓް ދޭން ނިންމައި، އިއުލާނުކުރި ލިސްޓް ރިވިއު ކުރުމުގެ މަސައްކަތް ކަމަށެވެ. އަދި އެ ލިސްޓް ރިވިއުކޮށް ނިންމައި، ކުރިޔަށް އޮތް ހަފްތާ ތެރޭގައި ވަގުތީ ލިސްޓު ނެރޭނެ ކަމަށްވެސް ހައިދަރު ވިދާޅުވިއެވެ.
މިނިސްޓަރު ހައިދަރު ވިދާޅުވީ އަލުން ވަގުތީ ލިސްޓު ނެރުމަށްފަހު ޝަކުވާ ހުށަހެޅުމުގެ ފުރުޞަތުވެސް ދެއްވާނެ ކަމަށެވެ.
"ހުރިހާ ފޯމްތަކެއް ރީއިވެލުއޭޓް ކޮށްފައި އަޅުގަނޑުމެން ކުރިއަށް މިއޮތް ހަފުތާ ތެރޭގައި އިރާދަކުރެއްވިއްޔާ ވަގުތީ ލިސްޓެއް އިއުލާން ކުރާނަން، ދެން ޝަކުވާގެ ފުރުސަތުވެސް އަޅުގަނޑުމެން ހުޅުވާލާނަން" ހައިދަރު ވިދާޅުވިއެވެ.
