ރާއްޖޭގެ އެކި ކަންކޮޅުތަކުގައި ޑިވެލޮޕްމަންޓް ޒޯންތަކާއި އަރބަން ސެންޓަރުތައް ތަރައްޤީ ކުރުމަކީ ފެށުނީއްސުރެ މި ސަރުކާރުން ގެންގުޅެމުން އައި ސިޔާސަތެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ވިދާޅުވެއްޖެއެވެ.

ރައީސް މިކަން ހާމަކުރައްވާފައިވަނީ އެމަނިކުފާނުގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައެވެ.

މި ޕޯސްޓުގައި ރައީސް ވަނީ ދިވެހީންގެ ރާއްޖެ މެނިފެސްޓޯގެ 4 ވަނަ ބާބުގެ 12، 13 އަދި 14 ވަނަ ނަންބަރުގައި ހިމެނޭ ދިވެހިރާއްޖޭގެ ދެމެހެއްޓެނިވި ތަރައްޤީއާބެހޭ ގޮތުން މެނިފެސްޓޯގައި ހިމެނޭ މައުލޫމާތުތައް ހިއްސާ ކުރައްވާފައެވެ.

އެގޮތުން ދިވެހިރާއްޖޭގެ ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަންގެ އިތުރުން އެންމެ މަތީ ފަންތީގެ ޚިދުމަތްތަކާއެކު، އެންމެ އުތުރުގެ 3 އަތޮޅު ހިމެނޭހެން ނޮދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި، އެންމެ ދެކުނުގެ 4 އަތޮޅު ހިމެނޭހެން ސަދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުމަށް މެނިފެސްޓޯގައި ހިމަނުއްވާފައިވާނެ ކަމުގައި ވިދާޅުވެފައިވެއެވެ.

އޭގެއިތުރަށް މާލެއިން އުތުރުގައި 3 އާރބަން ސެންޓަރާއި މާލެއިން ދެކުނުގައި 4 އާރބަން ސެންޓަރު ހިމެނޭހެން ޖުމްލަ 7 އަރބަން ސެންޓަރު ތަރައްޤީ ކުރެއްވުމަކީ ސަރުކާރުގެ ސިޔާސަތުކަން ވަރަށް ސާފުކޮށް މެނިފެސްޓޯގައި ބަޔާންކުރައްވާފައި ވާނޭކަމުގައި ރައީސް ވިދާޅުވެފައިވެއެވެ.

އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި ރައީސް  އެކަން ތަކުރާރު ކުރައްވާފައި ވާނެކަމަށްވެސް ރައީސްގެ ޕޯސްޓުގައި ފާހަގަ ކުރައްވާފައިވެއެވެ.

އަދި މިއީ، ކުރިއަށް އޮތް 20 އަހަރު ދުވަހަށް އެކަށައަޅުއްވަން މަސައްކަތް ފަށްޓަވާފައިވާ ތަރައްޤީގެ މާސްޓަރޕްލޭންގައި ހިމެނުއްވުމަށް ގަސްދުކުރައްވާ ކަންތައްތަކެއް ކަމަށާއި، އެ ކަންކަން އެކަށައަޅުއްވާނީ، ފަންނީ ފަރާތްތަކާއި ކައުންސިލްތަކާއި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލުވެސް ހިމެނޭގޮތަށް ކަމާބެހޭ ހުރިހާ ފަރާތްތަކެއްގެ ބައިވެރިވުމާ އެކުގައިކަމަށްވެސް ރައީސް ވަނީ ވިދާޅުވެފައެވެ.

ދިވެހީންގެ ރާއްޖެ މެނިފެސްޓޯގެ 4 ވަނަ ބާބު (ގެދޮރުވެރިކަމާއި އަރބަނައިޒޭޝަން) ގެ ނަންބަރު 4.12 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ހއ. އަތޮޅާއި، ހދ، އަތޮޅު އަދި ށ. އަތޮޅު ހިމެނޭ އުތުރުގެ ތަރައްޤީ ޒޯނުގައި، އިދާރީ މައި ހަބުގެ ގޮތުގައި ހދ. ކުޅުދުއްފުށި ހިމަނައިގެން، ބައިނަލްއަޤުވާމީ ދޮރޯއްޓެއްގެ ގޮތުގައި ހދ. ހަނިމާދޫ ޤާއިމުކޮށް، ހއ. އިހަވަންދިއްޕޮޅުގައި ބައިނަލްއަޤުވާމީ ޓްރާންސްޝިޕްމަންޓް ބަނދަރެއް ޤާއިމު ކުރުމުގެ ތަޞައްވުރެކެވެ.

ހަމަ މި ބާބުގެ 4.13 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ގއ. އަތޮޅާއި، ގދ، އަތޮޅު އަދި ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްޤީ ޒޯނުގައި، އިދާރީ މައި ހަބުގެ ގޮތުގައްޔާއި ބައިނަލްއަޤުވާމީ ދޮރޯއްޓެއްގެ ގޮތުގައި އައްޑޫ ސިޓީ ހިމަނައިގެން، ބައިނަލްއަޤުވާމީ ޓްރާންސްޝިޕްމަންޓް ބަނދަރަކާއި ސިނާޢީ މަސައްކަތްތަކާއި، މަސްވެރިކަމާއި، ދަނޑުވެރިކަމާއި، މެރިކަލްޗަރުގެ އިތުރުން ފަތުރުވެރިކަމުގެ ވަޞީލަތްތައް ފުޅާކޮށް، ތަރައްޤީ ކުރުމުގެ ތަޞައްވުރެކެވެ.

އަދި ހަމަ މި ބާބުގެ 4.14 ގައި ވަނީ، މެދުމިނުގެ އިތުރު 7 އަރބަން ސެންޓަރު (މާލެއިން އުތުރުގައި 3 އަދި ދެކުނުގައި 4 ހިމެނޭގޮތަށް) ތަރައްޤީކުރުމުގެ ތަޞައްވުރެކެވެ.