ރާއްޖޭގައި އާރބަން ސެންޓަރުގެ ގޮތުގައި ކަނޑައަޅައި، ތަރައްގީ ކުރާނެ 7 ރަށް ސަރުކާރުން ކަނޑައަޅައި އިއުލާނު ކޮށްފައިވާއިރު، ރާއްޖޭގެ އެންމެ އުތުރު ކަމުގައިވާ ބޮޑުތިލަދުންމައްޗާއި، ރާއްޖޭގެ އެންމެ ދެކުނުގެ ހަތަރު އަތޮޅު އުނިކޮށްފައިވާ ސަބަބު ސަރުކާރުން ސާފުކޮށްދޭން ޖެހޭނެ ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ރާއްޖޭގައި އާރބަން ސެންޓަރު ތަކުގެ ގޮތުގައި ތަރައްގީ ކުރަން ރައީސުލްޖުމްހޫރިއްޔާ ނިންމެވި 7 ރަށް ސަރުކާރުން އާންމު ކުރުމާއި ގުޅިގެން ޝާހިދު ވިދާޅުވީ އެ ލިސްޓުން ބޮޑުތިލަދުންމައްޗާއި، ދެކުނުގެ ސަރަހައްދު އުނިވެފައިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ކިޔައިދޭންޖެހޭ ކަމަށެވެ.
ޝާހިދު ވިދާޅުވީ މިކަހަލަ ބޮޑެތި ނިންމުންތައް ނިންމާއިރު، ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ސަރުކާރުން ހޯދުމަކީ މުހިންމު ކަމެއް ކަމަށެވެ.
އަރބަން ސެންޓަރގެ ގޮތުގައި ރަށްތަކެއް ކަނޑައެޅުމުގެ މަޤްޞަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަން ފެށުން ކަމުގައިވެގެން ނުވާނެ" ޝާހިދު ވިދާޅުވިއެވެ.
އާރބަން ސެންޓަރު ތަކުގެ ގޮތުގައި ސަރުކާރުން ތަރައްގީ ކުރަން ނިންމާފައިވާ ހަތް ރަށަކީ، ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ، ލ. ފޮނަދޫއެވެ.
