ހިޔާނާތުގެ މައްސަލައެއްގައި ތުހުމަތުކުރެވޭ އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް މޯލްޑިވްސް ކަރެކްޝަނަލް ސާވިސްގެ ވަޒީފާއިން ސަސްޕެންޑުކޮށްފިއެވެ.

ކަރެކްޝަނުން މިއަދު ބުނީ ތަހުގީގު ކުރަމުން އަންނަ މައްސަލައެއްގައި އޭސީޕީ އާސިފް ވަގުތީ ގޮތުން ސަސްޕެންޑް ކުރެވިފައިވާ ކަމަށެވެ. ނަމަވެސް މިކަމުގެ އިތުރު ތަފްސީލެއް ހާމަކޮށްފައެއް ނުވެއެވެ.

އެނގިފައިވާ ގޮތުގައި އޭސީޕީ އާސިފް ސަސްޕެންޑް ކޮށްފައިވަނީ އިއްޔެގެ ވަގުތެއްގައެވެ. އޭނާގެ މައްޗަށް ތުހުމަތު ކުރެވެނީ ޕްރިޒަންސް ކްލަބުގެ ފައިސާތަކެއް އަމިއްލަ އެކައުންޓްތަކަކަށް ޖަމާކުރި މައްސަލައެކެވެ. އެގޮތުން ޕްރިޒަންސް ކުލަބުގެ އެކައުންޓުން 200،000ރ.އަށް ވުރެ ގިނަ ރުފިޔާ އެކި އެކައުންޓުތަކަށް ޖަމާކުރިކަމަށް ބުނާ މައްސަލައެއް މިދިޔަ ޖުލައި މަހުގެ ތެރޭގައި ވަނީ ފެންމަތިވެފައެވެ.