2028 ވަނަ އަހަރު އޮންނަ ރިޔާސީ އިންތިޚާބުގައި ރައީސް ކަމަށް ވާދަކުރައްވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ރާއްޖެ ޓީވީގެ "ފަށާއިރު" ޕްރޮގްރާމްގައި މިއަދު ވާހަކަ ދައްކަވަމުން ޔާމީން ވިދާޅުވީ 2028 ވަނަ އަހަރު އިންތިޚާބުގައި ވާދަކުރައްވާނެ ކަމާމެދު "ޝައްކެއްވެސް ނެތް" ކަމަށެވެ.

ޔާމީން ވިދާޅުވީ، އިންތިޚާބުގައި ވާދަކުރައްވަނީ ހަމައެކަނި ވެރިކަން ބޭނުންވެގެން ނޫން ކަމަށެވެ.

"އަޅުގަނޑު ކުރިމަތިލަނީ އަޅުގަނޑު ހަމަ ވެރިކަން ބޭނުން ވެގެނެއް ނޫން. އަޅުގަނޑު ކުރިމަތިލުމުގައި އޮތީ މައިގަނޑު ތިން ކަމެއް އެނގޭތޯ،" ޔާމީން ވިދާޅުވި އެވެ.

އެ ތިން ސަބަބުގެ ގޮތުގައި ޔާމީން ވިދާޅުވީ، އޭގެތެރެއިން އެއް ފުރަތަމަ ސަބަބަކީ، ފޯޅަވަހި ކަނޑުގެ ސަރަހައްދުން ގެއްލުނު ބައި އަނބުރާ ރާއްޖެއަށް ހޯދައިދިނުން ކަމަށެވެ.

"އެންމެ ބޮޑު ކަމަކީ ފޯޅަވަހި ކަނޑުގެ ސަރަހައްދު ހޯދުމާ އަދި ހޯދޭ ކަމަށްވަންޏާ ފޯޅަވަހި ހޯދަން ކުރަންޖެހޭ ހުރިހާ މަސައްކަތެއް ކުރުން. މި ސަރުކާރަށް އެއް އަހަރު ވެގެންދިޔައީ އިޓްލޮސްގައި ނެތް ސިޓީއެއް، ކުރީގައި ނިންމާފައި އޮތް ނިންމުމަށް ތިމަންނަމެން އިހުތިޖާޖު ކުރަމޭ ކުރީގައި ނިންމަވާފައި އޮތް ނިންމުން އެ އޮތީ ރައީސުލްޖުމްހޫރިއްޔާ އަމިއްލަފުޅަށް ނިންމަވާފައޭ،" ޔާމީން ވިދާޅުވިއެވެ.

ރައީސް ކަމަށް ކުރިމަތިލައްވާ ދެވަނަ ސަބަބުގެ ގޮތުގައި ޔާމީން ވިދާޅުވީ، އިންޑިއާގެ މިލިޓަރީ ރާއްޖެއިން ބޭރު ކުރުން ކަމަށެވެ.

"ދެން އޮތީ އިންޑިއާ އަސްކަރިއްޔާ މިތަނުން ބޭލުން. މި ދެ ކަންތައް ހައްލު ކުރުމަށްޓަކައިވެސް އަޅުގަނޑު ބޭނުންވޭ ހިދުމަތުގެ ފުރުސަތެއް ލިބުން. އެއީ އަޅުގަނޑު ގަބޫލެއް ނުކުރަން ދެން ވަޑައިގަންނަވާ އެއްވެސް ބޭފުޅަކު މިކަންކަން ކުރައްވަފާނެކަމެއް. ހުރިހާ އެންމެންނަކީ ކޮމްޕްރޮމައިޒްޑް ބޭފުޅުން،" ޔާމީން ވިދާޅުވިއެވެ.

ޔާމީން ވިދާޅުވީ، އިންޑިޔާގެ މިލިޓަރީ ސިފައިން ރާއްޖޭގައި ނެތް ކަމަށް ރައީސް މުއިއްޒު ވިދާޅުވަމުން ގެންދެވިޔަސް، އެއީ ދޮގެއް ކަމަށެވެ. ރާއްޖޭގައި އިންޑިޔާގެ ސިފައިން އެބަތިބި ކަމާމެދު ޝައްކެއް ނެތް ކަމަށްވެސް ވިދާޅުވިއެވެ.

"ޔުނިފޯމުގައި ނެތިއްޔާ އިންޑިއާ މިލިޓަރީ ނެތީތޯ. ޔުނިފޯމް ނޫން އެހެން އެއްޗެއްގައި ތިބޭނެ ނޫންތޯ. ސަރުކާރުން މިކަހަލަ ބޮޑެތި ކަންކަމުގައި ދޮގު އެ ހަދަނީ. އަޅުގަނޑު މުތުލަގަށް މި ދަންނަވަނީ އެ ހަދަނީ ދޮގު. އިންޑިއާގެ އަސްކަރިއްޔާ މިތަނުގައި އެބަތިބި،" ޔާމީން ވިދާޅުވި އެވެ.

ރައީސް ކަމަށް ވަޑައިގަންނަވަން ބޭނުންފުޅުވާ ތިންވަނަ ކަމެއްގެ ގޮތުގައި ވިދާޅުވީ ޒުވާނުންނަށް ވަޒީފާގެ ގިނަ ފުރުޞަތުތަކެއް ހޯދައިދީ، އިގްތިސޯދު ރަނގަޅު ކުރުން ކަމަށެވެ.