އެންޓިކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) އަދި ސިވިލްސާވިސް ކޮމިޝަން (ސީއެސްސީ) ގެ ބައެއް މެންބަރުން ވަކިކުރަން ރައްޔިތުންގެ މަޖިލިހުގެ މިނިވަން މުއައްސަސާ ތަކުގެ ކޮމިޓީއަށް ހުށަހަޅައިފިއެވެ.
މިނިވަން މުއައްސަސާ ތަކުގެ ކޮމިޓީގެ މިއަދުގެ ބައްދަލުވުމުގައި، އެ ތިން ކޮމިޝަންގެ ވަކިވަކި މެންބަރުން ތަކެއްގެ މައްސަލަތައް ކޮމިޓީއަށް ހުށަހެޅިފައިވާކަން ކޮމިޓީގެ މެންބަރު މާފުށީ ދާއިރާގެ މެންބަރު ހުސައިން ރިޒާ އާދަމް ވިދާޅުވިއެވެ.
ނަމަވެސް އެ ހިސާބުން ކޮމިޓީއަށް ހުށަހެޅިފައި ވަނީ ހައްސާސް މައްސަލަތަކެއް ކަަމަށް ވިދާޅުވެ ކޮމިޓީގެ މަސައްކަތްތައް ކުރިއަށް ގެންދާނީ ސިއްރު ކޮށްގެން ކަމަށްވެސް ވިދާޅުވިއެވެ. އެހެން ކަމުން ކޮމިޓީ މެންބަރަކު ހުށަހަޅައިގެން ކޮމިޓީ ބައްދަލުވުން ސިއްރު ކުރަން ފާސްކުރިއެވެ. އޭގެފަހުން ކޮމިޓީ މަސައްކަތްތައް ކުރިއަށް ގެންދިޔައީ ސިއްރު ކޮށްގެންނެވެ.
މައުލޫމާތު ލިބިފައިވާ ގޮތުގައި ކޮމިޝަންތަކުގެ މެންބަރުންނާ ބެހޭގޮތުން ހުށަހަޅާފައިވާ ޝަކުވާތައް ކޮމިޓީގައި އިއްވުމުން އެ މައްސަލަތަކުގައި ހިމެނޭ މެންބަރުން ކޮމިޝަން ތަކުން ވަކިކުރަން މެންބަރަކު ހުށަހެޅުއްވިއެވެ.
ނަމަވެސް އެގޮތަށް ހުށަހެޅީ ކޮމިޓީގެ ކޮން މެންބަރެއްކަން އަދި ހުށަހެޅީ، ކޮން ބޭފުޅުންނެއް ވަކިކުރަންކަން އަދި ވަނީ އެނގޭގޮތް ނުވެފައެވެ. ކޮމިޝަންތަކުގެ މެންބަރުންގެ މައްސަލަ ކޮމިޓީއަށް ހުށަހަޅައި އޭގެތެރެއިން މެންބަރުން ތަކެއް ވަކިކުރަން ހުށަހަޅާފައި މިވަނީ، އޭސީސީ އާއި އީސީގެ ރައީސާއި ނާއިބު ރައީސް އައްޔަން ކުރުމަށް މަޖިލީހަށް ފޮނުވުމުގެ ބާރު ރައީސުލްޖުމްހޫރިއްޔާއަށް ލިބޭގޮތަށް ގާނޫނު އިސްލާހު ކުރަން މަޖިލީހަށް ބިލެއް ހުށަހަޅާފައި ވަނިކޮށެވެ.
