އެމެރިކާގެ ރިޔާސީ އިންތިޚާބު ދެވަނަ ފަހަރަށް މިއަދު ކާމިޔާބު ކުރެއްވުމަށްފަހު، ޑޮނަލްޑް ޓްރަމްޕް އެމަނިކުފާނުގެ އާއިލާއާއެކު އާންމުންގެ ތެރެއަށް ނުކުމެވަޑައިގަތީ އާއިލާ ބޭފުޅުންނާއެކުގައެވެ. އަނބިކަނބަލުން މެލާނީގެ އިތުރުން އަންހެން ދަރިފުޅު އިވާންކާ އާއި އެންމެ ހަގު ދަރިފުޅު ބެރޮންއާއެކުގައެވެ.

މި ފެނިލުމާއެކު އެންމެންގެ ނަޒަރު ގޮސް ހުއްޓުނީ ޓްރަމްޕްއަކަށް ނޫނެވެ. އެމަނިކުފާނު ދަރިކަލުން އުމުރުން 18 އަހަރުގެ ބެރޮންއަށެވެ. ބެރޮންގެ ދިގު އިސްކޮޅުގެ ސަބަބުންނެވެ. އާއިލާގެ ހުރިހާ ބޭފުޅުން އެކުގައި ތިއްބަވާއިރު ބެރޮންގެ ދިގު އިސްކޮޅުގެ ސަބަބުން އޭނާ ހުރީ މާއުހުގައެވެ. ބެރޮންގެ އިސްކޮޅުގައި 6 ފޫޓް 7 އިންޗި ހުރެއެވެ.

ބެރޮންގެ ދިގު އިސްކޮޅާމެދު ޓްރަމްޕް ވިދާޅުވެފައި ވަނީ ދަރިކަލުންގެ އިސްކޮޅު ދިގުވުމުން އެކަމުގެ ޝުުކުރު ހައްގުވާ ބޭފުޅަކީ އަނބިކަނބަލުން މެލާނީގެ މަންމާފުޅަށް ކަމަށެވެ. ބެރޮންގެ މާމަ، އމަލިޖާއަށް ކަމަށެވެ. ޓްރަމްޕް ވިދާޅުވީ ބެރޮން އެހާވަރަށް އިސްކޮޅުން ދިގުވި ސަބަބަކީ ހަމައެކަނި "މައިދައިތަގެ ކާނާ" ކެއުމުން ކަމަށެވެ.

ބެރޮންގެ ބައްޕާފުޅަށް މިއަދު ލިބިވަޑައިގެންނެވި ކާމިޔާބާއެކު އޭނާވެސް މިހާރު ތައްޔާރު ވަމުންދަނީ ބައްޕާފުޅާއެކު އެމެރިކާގެ ރިޔާސީ ގަނޑުވަރު، ވައިޓްހައުސްއަށް ދެވަނަ ފަހަރަށް ބަދަލުވެވަޑައިގަތުމަށެވެ. މީގެކުރިން 2017 ން 2021 އަށްވެސް ބައްޕާފުޅު ޓްރަމްޕާއެކު އޭނާ ވަނީ ވައިޓްހައުސްގައި ދިރިއުޅުއްވާފައެވެ.

އެމެރިކާގައި މިފަހަރު ބޭއްވި ރިޔާސީ އިންތިޚާބު ޓްރަމްޕް ވަނީ ކާމިޔާބު ކުރައްވާފައެވެ.