މާލޭގައި ހުންނަ އޭ ލެވެލް ސްކޫލް، ސީއެޗްއެސްއީގެ އިމާރާތް، ރައީސް ޑރ. މުހައްމަދު މުއިއްޒު މިރޭ ހުޅުއްވައިދެއްވައިފި އެވެ.
ރައީސް، އެ ސްކޫލް ރަސްމީކޮށް މިރޭ ހުޅުވައިދެއްވިޔަސް އެތަނުގައި މިދިޔަ ސެޕްޓެމްބަރު މަހުގެ ތެރޭގައި ވަނީ ކިޔަވައިދޭން ފަށައިފަ އެވެ.
ސީއެޗްއެސްއީ ރަސްމީކޮށް ހުޅުވުމަށް މިރޭ ބޭއްވި ރަސްމިއްޔާތުގައި އެ ސްކޫލުގެ ފަރާތުން ވަނީ އެހާރާއި މިހާރުގެ ހަނދާނީ ރަމްޒެއް ވެސް ރައީސަށް އަރުވައިފަ އެވެ.
އަމީނިއްޔާ ސްކޫލުގެ ފުރަގަހުގައި ހިންގަމުން އައި އިމާރާތް ބޭނުންކުރުން މިދިޔަ އޮގަސްޓް މަހު ހުއްޓާލުމަށް ފަހު، ސީއެޗްއެސްއީ ބަދަލުކުރީ ހުޅުމާލޭގައި އަލަށް ހެދި އިމާރާތަށެވެ.
އެކަމަކު މާލޭގައި ހުރި ސްކޫލްގައި އަލުން ކިޔަވައިދޭން ފަށަން އެޑިއުކޭޝަން މިނިސްޓްރީން ނިންމީ، މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމުން އެ ކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރާތީ އެވެ.
