ތާލިބާން ޖަމިއްޔާއިން، ޕާކިސްތާނަށް ކަނޑައަޅައިފައިވާ މަންދޫބާ، ރާއްޖެއިން ޕާކިސްތާނަށް ކަނޑައަޅުއްވާފައި ހުންނަ ސަފީރު ތޯހާ އިބްރާހިމް ބައްދަލު ކުރެއްވި މައްސަލައިގައި ތޯހާ ރާއްޖެއަށް އަނބުރާ ގެނައުމަށް ނިންމައިފައިވާ ކަމަށް ފޮރިން މިނިސްޓްރީން ބުނެފި އެވެ.

ތޯހާ ވަނީ އަފްޣާނިސްތާނުން ޕާކިސްތާނަށް ހަމަޖައްސާފައިވާ ސަފީރު ސަރުދާރު އަހުމަދު ޝަކީބުއާ ޕާކިސްތާނުގެ ވެރިރަށް، އިސްލާމްއާބާދުގައި މިދިޔަ ހުކުރު ދުވަހު ބައްދަލު ކުރައްވައިފަ އެވެ. އެކަމާ ގުޅިގެން، ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނެފައިވަނީ އަފްޣާނިސްތާނުގެ މަންދޫބާ، ތޯހާ ބައްދަލު ކުރެއްވީ ދިވެހި ސަރުކާރުގެ ހުއްދަ ނެތި ކަމަށާއި އެކަމުގައި އޭނާ އަށް ފިޔަވަޅު އަޅާފައިވާ ކަމަށެވެ.

ނަމަވެސް ތޯހާ އަޅައިފައިވަނީ ކޮން ފިޔަވަޅެއް ކަމެއް ފޮރިން މިނިސްޓްރީން ބުނެފައިނުވެ އެވެ. އެނގިފައިވާ ގޮތުގައި ފޮރިން މިނިސްޓްރީން ވަނީ ތޯހާ އެނބުރި ރާއްޖެއަށް އައުމަށް އަންގައިފަ އެވެ.

އެމެރިކާ އާއި އިނގިރޭސި ސިފައިން 20 އަހަރު ވަންދެން އަފްޣާނިސްތާނު އަޅުވެތިކޮށް ތިބުމަށް ފަހު، އޮގަސްޓް 2021 ގައި އެ ގައުމުން ފޭބުމާއެކު، ތާލިބާނުންގެ ހަނގުރާމަވެރިން ވަނީ އެ ގައުމުގައި އޮތް ސަރުކާރު ވައްޓާލައި، ވެރިކަމަށް އަރައިފައެވެ.

ތާލިބާނުން އަފްޣާނިސްތާނުގެ ވެރިކަމާ ހަވާލުވިތާ ތިން އަހަރު ވެގެން ދިޔައިރުވެސް ގިނަ ގައުމަކުން އަދި ބައިނަލްއަގުވާމީ ޖަމާއަތް ތަކުންވެސް ތާލިބާނުންގެ ސަރުކާރު ގަބޫލެއް ނުކުރެއެވެ.