އޯ ލެވެލްއިން ފާސްނުވުމުގެ ސަބަބުން އިތުރަށް ކުރިއަށް ނުދެވިފައިތިބި ދަރިވަރުންް އެމްއެންޑީއެފް އަދި ފުލުހުންގެ ވަޒީފާއަށް ވަނުމަށް މަޖުބޫރު ޕްރޮގްރާމެއް ފެށުމަށް ނިންމައިފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ނަސްރުގެ ދުވަހުގެ ރަސްމީ ޖަލްސާގައި މިރޭ ވާހަކަފުޅު ދައްކަވަމުން ރައީސް ވިދާޅުވީ ސަރުކާރުން ރާވާފައިވާ މިންވަރަށް އެމްއެންޑީއެފް އަދި ފުލުހުންގެ ހިދުމަތް ފުޅާ ކުރުމަށް އެއިން ކޮންމެ މުއައްސަސާ އަކަށް އަހަރަކު 1،000 މީހުން ބޭނުންވާ ކަމަށެވެ.
"ޖުމްލަ ފަސް ހާހެއްހާ ޒުވާނުން، މި ދެންނެވި ގޮތަށް ވަޒީފާ ހޯދުމުގެ ފުރުސަތު ނުލިބިފައި، ތައުލީމް އެކަށީގެންވާ ވަރަކަށް ނުލިބި މަގުމައްޗަށް ގިނަވާ ކުދިންނަށް މި ފުރުސަތު ހޯދައިދެވި، ރަނގަޅު ބަޔަކަށް ހެދިއްޖެއްޔާ އެ ލިބެނީ ވަޒީފާގެ ފުރުސަތުވެސް ދެވިގެންދަނީ، މި ދެންނެވި ފަދައިން ސިފައިންގެ މަސައްކަތަށްވެސް ގިނަ ބަޔަކު ލިބިގެންދޭ،" ރައީސް ވިދާޅުވި އެވެ.
"ރާއްޖޭގައި ގައުމީ ހިދުމަތުގެ ޕްރޮގްރާމްގެ ގޮތުގައި ނޭޝަނަލް ސާވިސް ޕްރޮގްރާމްގެ ގޮތުގައި މި އަންނަ އަހަރުން ފެށިގެން ކޮންމެ އަހަރަކު ހިންގޭ ގައުމީ ޕްރޮގްރާމެއް އިރާދަކުރެއްވިއްޔާ ފެށިގެންދާނެ. މި ޕްރޮގްރާމް ވެގެން ދާނީ ގާނޫނެއް ހެދިގެން، އެ ގާނޫނުން ބާރު ލިބިގެން، އުމުރުން 16 އަހަރުވުމަށްފަހު، އެ 16 އަހަރުވެގެން އޯ ލެވެލް ނިންމާފައި ނޫނީ ތައުލީމް ހާސިލް ކުރެވުނު ހިސާބަކުން ދެން މައްޗަށް ދިއުމުގެ ފުރުސަތު ނުލިބޭ ކުދިންނަށް އަދި ވަޒީފާއެއްވެސް ނުލިބޭ ކުއްޖެއްވިއްޔާ މި ޕްރޮގްރާމްގައި ބައިވެރިވާންޖެހޭނެ." ރައީސް ވިދާޅުވިއެވެ.
އެ ޕްރޮގްރާމްގައި ބައިވެރިވެގެން ތަމްރީނު ރެކްރޫޓްމަންޓް ޕްރޮގްރާމް ނިންމުމުން ސިފައިންގެއިން ނުވަތަ ފުލުހުންގެ އިދާރާއިން ވަޒީފާ ހަމަޖެހިގެންދާނެ ކަމަށް ރައީސް ވިދާޅުވި އެވެ.
އޯ ލެވެލް ނިންމުމަށްފަހު އޭ ލެވެލްއަށް ވަދެވޭ ވަރަށް ކޮންމެ އަހަރަކުވެސް 2،000-3،000 ދަރިވަރުން ފާސްނުވާ ކަމަށާއި އަދި އޭ ލެވެލް ނިންމާފައި ޑިގްރީއަށް ނުފެށޭ 500-1000 ކުދިން އެބަތިބި ކަމަށް އެ މަނިކުފާނު ވިދާޅުވި އެވެ.
އޯ ލެވެލްގައި ރަނގަޅު ނަތީޖާ ނުލިބޭތީ ވަޒީފާއެއް ނުލިބުނަސް، ގާނޫނު އޮތްގޮތުން ސިފައިންގެ ޚިދުމަތަށް އެ ކުދިން ނުނެގޭ ކަމަށާއި ނަމަވެސް އެކަށީގެންވާ ތައުލީމު ނެތުމާއި ޑްރަގްގެ ވަބާގައި ޖެހުމުންދާތީ މުޖުތަމައު އަދި ސަރުކާރުން އުފުލާ ބުރަ ބޮޑުވެ، އިގުތިސޯދަށް ނުރަނގަޅު އަސަރު ކުރަމުންދާ ކަމަށް ރައީސް ވިދާޅުވި އެވެ.
އެ ޕްރޮގްރާމަށް އަންނަ އަހަރުގެ ބަޖެޓުން ވަނީ 400 މިލިއަން ރުފިޔާ ކަނޑައަޅަން ނިންމައިފަ އެވެ. އެއަށްފަހު، ކޮންމެ އަހަރަކުވެސް އެކަމަށް އެކަނި 400 މިލިއަން ރުފިޔާ އިތުރު ކުރާނެ ކަމަށް ވިދާޅުވިއެވެ.
