ރާއްޖޭގެ ވެރިކަން ގާނޫނާ ހިލާފަށް ހަތިޔާރު ބޭނުން ކޮށްގެން ބަދަލު ކުރުމަށްއައި ދުޝްމުންނަށް ދިވެހި ގިނަ ރައްޔިތުންގެ ފަރާތުން އެއްވެސް އެހީތެރިކަމެއް ލިބިފައިނުވާ ކަމަށާއި މަދު ދިވެހިން ތަކެއް ދުޝްމަނުނާ ބައިއަތު ހިފައިގެން ތިބި ނަމަވެސް، ގިނަ ދިވެހި ރައްޔިތުން ތިބީ ގައުމާއި ސަރުކާރުގެ ދިފާއުގައި ކަމަށް އޭރުގެ ރައީސް މައުމޫން އަބްދުއްގައްޔޫމް ވިދާޅުވެއްޖެ އެވެ.
މިއަދު ފާހަގަކުރާ 36 ވަނަ ނަސްރުގެ ދުވަހުގެ މުނާސަބަތުގައި ދަރުބާރުގޭގައި ބޭއްވި ރަސްމީ ޖަލްސާގައި ވާހަކަ ދައްކަވަމުން މައުމޫން ވިދާޅުވީ ނޮވެމްބަރު 3 ގެ ހާދިސާއިން ދިވެހިންނަށް ވަރަށް ގިނަ ފިލާވަޅުތައް ދަސްކޮށްދިން ކަމަށާއި ހާސިލްކޮށްދިން އިބްރަތްތައްވެސް ގިނަ ކަމަށެވެ. މައުމޫން ވިދާޅުވީ ނޮވެމްބަރު 3 ގެ ހާދިސާއާ މެދު ނަޒަރު ހިންގާލާއިރު، ވަރަށް ހާއްސަ ގޮތެއްގައި ފާހަގަ ކޮށްލަންޖެހޭ ކަންތައްތަކެއް އެބަހުރި ކަމަށެވެ.
"އޭގެތެރެއިން އެއް ކަމަކީ ދިވެހި ރައްޔިތުންގެ އެއްބައިވަންތަކަން، ނުގުޑާފަދަ އަޒުމަކާއެކު އަބަދުވެސް ހިފެހެއްޓުމުގެ މުހިންމުކަން." މައުމޫން ވިދާޅުވި އެވެ.
"ސަރުކާރާމެދު ހިތްހަމަ ނުޖެހިފައިތިބި މަދު ބަޔަކު ތިބި ނަމަވެސް، އެ ދުވަހު އެންމެންވެސް ތިބީ ސަރުކާރާއެކީގަ. ރާއްޖެއަށް ހަމަލާދިން ދުޝްމަނުންނަށް އެއްވެސް ދިވެއްސެއްގެ ފަރާތުން ކުޑަވެސް އެހީތެރިކަމެއް އެދުވަހު ނުލިބުނު. އެންމެ ކުޑަވެގެން ހޫނު ދުވަހެއްގައި ބޯލާނެ ފެންތައްޓެއްހާ ހިސާބުވެސް ނުލިބުނު" މައުމޫން ވިދާޅުވި އެވެ.
މައުމޫން ވިދާޅުވީ ދުނިޔޭގެ ކަންތައްތައް ބަދަލުވަމުންދާ ގޮތުން ރާއްޖޭގެ ގައުމީ މަސްރަހަށާއި އަދި ޒަމާނާ އެކަށީގެންވާ ގޮތަކަށް ރާއްޖޭގެ ގާނޫނު ތަކާއި ގަވައިދުތައް ބަދަލުވެގެން ދިޔަނަމަވެސް، ރާއްޖޭގައި ސިޔާސީ ޕާޓީ ތަކެއް އުފެދި ހިނގަމުން ދިޔަނަމަވެސް، އެއިން އެއްވެސް ކަމެއްގެ ސަބަބުން ދިވެހި ގައުމީ ވަހްދަތަށް އެއްވެސް އުނިކަމެއް އައިސްގެން ނުވާނެ ކަމަށެވެ.
ދުޝްމަނުގެ ކިބައިން ރާއްޖެއަށް ނަސްރު ލިބުނީ މާތް ﷲ ގެ ހަޟްރަތުން ކަމަށާއި އެއީ ގަބޫލު ކުރަން ޖެހޭ ހަގީގަތެއް ކަމަށާއި އެހެންވެ، އަމިއްލަ ސަލާމަތަށްޓަކައިވެސް އަޅުގަނޑުމެންގެ އީމާންތެރިކަން ވަރުގަދަ ކުރަންޖެހޭ ކަމަށް މައުމޫން ވިދާޅުވި އެވެ.
މައުމޫން މިރޭ އެދިވަޑައިގެންނެވި އެއްކަމަކީ ރާއްޖެއަށް އެހީތެރިކަން ފޯރުކޮށްދޭ ބައިނަލްއަގްވާމީ ފަރާތްތަކާއެކު އޮންނަ ގުޅުން ދެމެހެއްޓުމަށެވެ. ނޮވެމްބަރު 3 ވަނަ ދުވަހު ރާއްޖެއަށް އެންމެ ފުރަތަމަ އެހީތެރިކަން ފޯރުކޮށްދިން އިންޑިއާގެ ސިފައިންނަށް ދިވެހިންގެ ޝުކުރު އަބަދުވެސް އޮންނާނެ ކަމަށް މައުމޫން ވިދާޅުވިއެވެ
