ރާއްޖޭގައި މިހާތަނަށް ހިނގާފައިވާ އެކިއެކި ހާދިސާ ތަކުގައި ޝަހީދުވި ސިފައިންގެ އާއިލާތަކަށް ހާއްސަ އެލަވަންސެއްދީ، އެ އާއިލާ ތަކަށް ހާއްސަކޮށްގެން މި ދައުރުގެ ތެރޭގައި ހައުސިން މަޝްރޫއެއް ފަށްޓަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ނަސްރުގެ ދުވަހުގެ ރަސްމީ ޖަލްސާގައި މިރޭ ވާހަކަފުޅު ދައްކަވަމުން ރައީސް ވިދާޅުވީ ޑިިފެންސް މިނިސްޓްރީ މެދުވެރިކޮށް އެމަނިކުފާނު އެއް ކުރެއްވި މައުލޫމާތުން އެނގޭ ގޮތުން ނަމަ، މިދިޔަ 40 ވަރަކަށް އަހަރުގެ ތެރޭގައި 29 ސިފައިން އެކިއެކި ހާދިސާ ތަކުގައި ޝަހީދުވި ވެފައިވާ ކަމަށެވެ. ރައީސް ވިދާޅުވީ އެ ޝަހީދުންގެ އަގުވަޒަން ކުރުމުގެ ގޮތުން ވޭތުވެދިޔަ ސަރުކާރު ތަކުން އެއްވެސް ކަމެއް ކޮށްދީފައިނުވާ ކަމަށެވެ.
"ކުރީގައި ޝަހީދުވި މީހުންގެ އާއިލާތަކަށް ކޮންމެވެސް ވަރެއްގެ ފައިސާއެއް ދީ ހެދި. ނަމަވެސް ފަހަކަށް އައިސް އެކަންވެސް ވަނީ ހުއްޓިފައި. އަޅުގަނޑު ގަބޫލުކުރާ ގޮތުގައި ވަރަށް ބޮޑު ބޭއިންސާފެއް." ރައީސް ޑރ. މުއިއްޒު ވިދާޅުވިއެވެ.
ރައީސް ވިދާޅުވީ އަންނަ އަހަރުން ފެށިގެން ޝަހީދުވި މީހުންގެ އާއިލާތަކަށާއި 3 ނޮވެމްބަރުގެ މެޑަލް ފޯ އެކްސެޕްޝަނަލް ބްރޭވަރީ ލިބުނު ފަސް މީހަކާއި މެޑަލް ފޯ ބްރޭވަރީ ލިބިފައިވާ 10 މީހުން ހިމެނޭހެން ހާއްސަ އެލަވަންސެއް ދިނުމަށް ނިންމަވާފައިވާ ކަމަށެވެ. އެކަން ކުރާނީ އުސޫލެއްގެ މަތިން ސަރުކާރުގެ ގެޒެޓްގައި ޝާއިއު ކުރެވި ދެމެހެއްޓެނިވި ގޮތެއްގައި ކަމަށް ރައީސް ވިދާޅުވި އެވެ.
