އެމެރިކާގެ ރިޔާސީ އިންތިހާބަށް އެންމެ ހަފްތާއެއްހާ ދުވަސް ބާކީ އޮއްވައި، އެމެރިކާގެ ނައިބް ރައީސް އަދި ޑިމޮކްރެޓިކް ޕާޓީގެ ރިޔާސީ ކެންޑިޑޭޓް ކަމަލާ ހެރިސް، ކުރީގެ ރައީސް އަދި ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕްގެ މައްޗަށް ހިޔާލު ހޯދުމުގެ ވޯޓު ތަކުގައި ކުރި ހޯދައިފި އެވެ.
ހިޔާލު ހޯދުމުގެ ވޯޓު ތަކުގައި ހެރިސްއަށް އެންމެ ގިނައިން ލިބިފައިވަނީ އަންހެނުންގެ ވޯޓެވެ. އޭބީސީ ނިއުސް/އިޕްސޮސް ހިޔާލު ހޯދުމުގެ ވޯޓުން ދައްކާ ގޮތުގައި ވޯޓުލާން ގަސްދުކުރާ މީހުންގެ ތެރެއިން 51 ޕަސަންޓް މީހުން ހެރިސްއަށް ތާއީދު ކުރާއިރު 47 ޕަސަންޓް މީހުން ޓްރަމްޕަށް ތާއީދު ކުރާކަމަށް ދައްކައެވެ.
އަދި ސީބީއެސް ނިއުސް/ޔޫގޮވް ހިޔާލު ހޯދުމުގެ ވޯޓުން ހެރިސްއަށް 50 އިންސައްތަ އަދި ޓްރަމްޕަށް 49 އިންސައްތަ މީހުން ތާއިދު ކުރާކަމަށް ދައްކައެވެ.
ސީބީއެސް ހިޔާލު ހޯދުމުގެ ވޯޓުގައި އަންހެނުންގެ 55 އިންސައްތަ ހެރިސްއަށް ތާއީދު ކުރާއިރު 43 އިންސައްތަ ޓްރަމްޕަށް ތާއީދު ކުރެއެވެ. އޭބީސީގެ ވޯޓުގައި އަންހެނުންގެ 56 އިންސައްތަ ހެރިސްއަށް ތާއީދު ކުރާއިރު 42 އިންސައްތަ ޓްރަމްޕަށް ތާއީދު ކުރެއެވެ.
ހެރިސް ވަނީ އިގްތިސާދާއި އަންހެނުންގެ ހައްގުތަކުގެ މައްސަލަތަކަށް އަލިއަޅުވާލައި ކެމްޕޭން ކުރިއަށް ގެންގޮސްފައެވެ. އަދި ކުރީގެ ފަސްޓް ލޭޑީ މިޝެލް އޮބާމާ ވަނީ ހެރިސްއާއެކު މިޝިގަންގައި ކެމްޕޭން ކުރައްވައި، އަންހެނުންގެ ހައްގުތަކަށް އަންނަމުންދާ ބަދަލުތަކާ ގުޅޭގޮތުން ވާހަކަފުޅު ދައްކަވާފައެވެ.
އިންތިހާބު ބޭއްވުމަށް 10 ދުވަހަށް ވުރެ މަދު ދުވަސްކޮޅެއް ބާކީ އޮތްއިރު ދެ ކެންޑިޑޭޓުންވެސް ދަނީ އާއްމު ރައްޔިތުންނާއި ބައްދަލުކުރުމަށް ގައުމުގެ އެކި ސަރަހައްދު ތަކަށް ދަތުރު ކުރަމުންނެވެ.
