މޯލްޑިވްސް މީޑިޔާ ކައުންސިލުގެ މުސްތަގިއްލުކަމާ ދެކޮޅަށް ސަރުކާރުން ހިންގާ އަމަލުތައް ހުއްޓާލުމަށް އެމްޑީޕީގެ ރައީސް އަބްދުﷲ ޝާހިދު ގޮވާލައްވައިފިއެވެ.
ސޯޝަލް މީޑިޔާގައި ކުރެއްވި ޕޯސްޓެއްގައި ޝާހިދު ވިދާޅުވީ، މިނިވަން މުއައްސަސާ ތަކަށް ސަރުކާރުން ނުފޫޒު ފޯރުވައި، ބިރު ދައްކަމުންދާ ކަމަށެވެ. އަދި އެކަންކަން ހުއްޓާލުމަށް ޝާހިދު ވަނީ ސަރުކާރަށް ގޮވާލައްވާފައެވެ.
"މިނިވަން މުއައްސަސާތަކަށް ނުފޫޒު ފޯރުވުމާ ބިރު ދެއްކުން ސަރުކާރުން ހުއްޓާލަން ޖެހޭ. މީޑިއާގެ މިނިވަންކަމާއި، މީޑިއާ ރެގިއުލޭޓްކުރުމަށް މަތިކޮށްފައިވާ މީޑިއާ ކައުންސިލްގެ މުސްތަގިއްލުކަމާ ދެކޮޅަށް ސަރުކާރުން ހިންގާ އަމަލުތައް ހުއްޓާލަންޖެހޭ." ޝާހިދު ވިދާޅުވިއެވެ.
ޝާހިދު މިފަދައިން ސަރުކާރަށް ގޮވާލެއްވީ، މީޑިޔާ ކައުންސިލުގެ އެވޯޑު ދިނުމުގެ ރަސްމިއްޔާތުގައި "އަދަދު" ނޫހުން ތައްޔާރު ކޮށްފައިވާ ޑޮކިއުމެންޓްރީއެއް ދެއްކި މައްސަލައިގައި ޕީއެސްއެމުން ރައްޔިތުންގެ މަޖިލީހަށް ހުށަހަޅާފައިވާ ދަނޑިވަޅެއްގައެވެ.
އަދި އެ މައްސަލައާއި ގުޅިގެން މީޑިޔާ ކައުންސިލުގެ ރައީސް ކަމުގައި ހުންނެވި މުސްތޮފާ، ޕީއެސްއެމްގެ ވަޒީފާއިން ވަކިކޮށްފައިވާ ދަނޑިވަޅެއްގައެވެ. ނަމަވެސް އޭނާގެ ވަޒީފާ މިހާރު ވަނީ އަލުން އިއާދަ ކޮށްފައެވެ.
އެކަމާއި ގުޅިގެން ޝާހިދު ވިދާޅުވީ، މީޑިޔާ ކައުންސިލްގެ ރައީސް އޭނާ ޕީއެސްއެމްގައި ހުންނެވި ވަޒީފާއިން ވަކި ކުރި ކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެއީ ސަރުކާރުގެ ނާގާބިލުކަމާއި އަނިޔާވެރިކަން ކަމަށާއި، އެކަން ދުވަހަކަށްވުރެ ދުވަހެއް އިތުރު ވަމުންދާ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، ނޫސްވެރިކަމަކީ ޑިމޮކްރަސީގެ ހަތަރު ވަނަ ބާރު ކަމަށެވެ. އަދި މީޑިޔާ ތަކުން ރައްޔިތުންނަށް ތެދު ޚަބަރާއި މަޢުލޫމާތު ފޯރުކޮށް ދިނުމަށް ކުރަމުން އަންނަ މަސައްކަތަށް ޝާހިދު ވަނީ ޝުކުރު އަދާކުރައްވާފައެވެ.
