އިލެކްޝަންސް ކޮމިޝަން (އޭސީ) އާއި އެންޓިކޮރަޕްޝަން ކޮމިޝަން (އޭސީސީ) ގެ ރައީސް އާއި ނައިބު ރައީސުންނަކީ، ރައީސުލްޖުމްހޫރިއްޔާ އައްޔަން ކުރައްވާ ބަޔަކަށް ހެދުމަށް ސަރުކާރުން ގާނޫނަށް ގެންނަން އުޅޭ އިސްލާޙު ނުގެނައުމަށާއި އެކަން އެގޮތަށް ނުކުރުމަށް ދަ ޑިމޮކްރެޓްސް އިން ގޮވާލައިފިއެވެ.

ސަރުކާރުން ގެންނަން އުޅޭ ބަދަލާއި ގުޅިގެން އެ ޕާޓީން ނެރުނު ބަޔާނެއްގައި ބުނީ މިނިވަން މުއައްސަސާތަކެއްގެ މުސްތަގިއްލުކަން ނަގާލެވޭފަދަ އަމަލެއް ނުކުރުމަށް ސަރުކާރަށް އެޕާޓީން ގޮވާލާ ކަމަށެވެ.

"އެއިރެއްގައި އޮންނަ ސަރުކާރަށް ނިސްބަތްވާ ފަރާތްތައްވެސް ބައިވެރިވާ އާންމު އިންތިހާބުތައް ބާއްވާ ކޮމިޝަނާއި، ސަރުކާރަށްވެސް އަމާޒުވާ ކޮރަޕްޝަނާއި ފަސާދައިގެ މައްސަލަތައް ބެލުމަށް އޮންނަ ކޮމިޝަނާއި، މި ދެ ކޮމިޝަނުގެ މިނިވަންކަމާއި މުސްތަގިއްލުކަން މުހިއްމުވެފައި ލާޒިމުވަނީ ސަރުކާރުގެ ނުފޫޒެއްގައި ނުޖެހި އެ މަސްއޫލިއްޔަތުތަކާއި ޒިންމާތައް އެ ކޮމިޝަން ތަކުން އަދާކުރަންޖެހޭތީ ކަމަށް މި ޕާޓީން ދެކެން،"  ޑިމޮކްރެޓްސްގެ ނޫސްބަޔާނުގައި ބުނެފައިވެއެވެ.

ޑިމޮކްރެޓްސްއިން ބުނީ ސަރުކާރުން މިހާރު މަޖިލިސްއަށް ހުށަހަޅާފައިވާ އެ ބިލުގައި ވާގޮތަށް އެ ދެކޮމިޝަނުގެ ވެރިންނަކީ ރައީސުލްޖުމްހޫރިއްޔާ އައްޔަން ކުރައްވާ ބަޔަކަށް ވެއްޖެނަމަ، ކޮމިޝަނުގެ މުސްތަގިއްލުކަމަށް ލޮޅުން އަރާނެ ކަމަށެވެ.

އެ ޕާޓީން ބުނީ، މިކަމަކީ، ދިވެހި ރައްޔިތުންގެ އިންތިހާބީ އެންމެހައި ހައްގުތަކުގެ އިންސާފުވެރިކަމާ މިނިވަންކަން ކަށަވަރު ކުރުމުގެ ޒިންމާ އަދާކުރަންޖެހޭ އިލެކްޝަންސް ކޮމިޝަނާއި، ރައްޔިތުންގެ މާލިއްޔަތާއި ދައުލަތް ހިންގުމުގެ ތެރޭގައި ހިނގާ ކޮރަޕްޝަނާ ފަސާދަ މިނިވަންކަމާއެކު ބަލައި، ފިޔަވަޅު އެޅުމުގެ ޒިންމާ އަދާކުރަންޖެހޭ އޭސީސީގެ މަސައްކަތުގެ ތެރެއަށް ރައީސް ވަދެވަޑައިގަތުން ކަމަށެވެ. އެހެންކަމުން އެއީ ޑިމޮކްރެޓިކް އަސާސްތައް އަދި ގާނޫނުއަސާސީގެ ރޫހަށް ބަލާއިރުވެސް ތަންދޭ ކަމެއް ނޫން ކަމަށް އެޕާޓީން ވަނީ ބުނެފައެވެ. އެހެންވެ، ސަރުކާރުން އެގޮތަށް އަމަލު ނުކުރުމަށް އެ ޕާޓީން ވަނީ ގޮވާލާފައެވެ.