އައިލެންޑް އޭވިއޭޝަން ސާވިސަސް (އައިއޭއެސް) ގެ ޑެޕިއުޓީ މެނޭޖިން ޑައިރެކްޓަރު ކަމުން ވަކިކުރި މ. ޏަމްޏަމްގެ އައިޝަތު ޖެނިފާ، އަލުން އެމަގާމަށް އައްޔަން ކުރުމަށް ވަޒީފާއާބެހޭ ޓްރައިބިއުނަލުން އަމުރު ކޮށްފިއެވެ.
އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ޖެނިފާ އައްޔަންކުރީ، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 25 ޑިސެމްބަރު 2018 ގައެވެ.
ނަމަވެސް، ރައީސް ޑރ. މުހައްމަދު މުއިއްޒުގެ ސަރުކާރު އައިސް، 28 ޑިސެމްބަރު 2023 ގައި ބޭއްވި އެ ކުންފުނީގެ ބޯޑު ބައްދަލުވުމުގައި ޖެނިފާ ވަޒީފާއިން ވަކިކުރަން ނިންމައި، 3 ޖެނުއަރީ 2024 ގައި އޭނާ ވަޒީފާއީން ވަކިކުރިއެވެ.
ނަމަވެސް އޭނާ ވަޒީފާއިން ވަކި ކޮށްފައި ވަނީ ޤާނޫނާ ޚިލާފަށް ކަމަށްބުނެ ޖެނިފާގެ ފަރާތުން އެ މައްސަލަ ޓްރައިބިއުނަލަށް ހުށަހެޅިއެވެ.
ޓްރައިބިއުނަލްގައި އޭނާ އެދިފައި ވަނީ، އޭނާ ވަޒީފާއިން ވަކިކުރީ ޤާނޫނާ ޚިލާފަށް ކަމަށް ކަނޑައަޅައި ދިނުމާއެކު، ވަޒީފާއިން ވަކި ކުުރަން ބޯޑުން ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅައި ދިނުމަށާއި، ވަޒީފާއިން ވަކިކުރިކަން އެންގި އެންގުމަކީ ބާތިލް އެއްގުމެއް ކަމަށް ކަނޑައަޅައި ދިނުމަށެވެ. އަދި އޭނާ ވަޒީފާއިން ވަކިކޮށް، ނެރެފައިވާ ޗިޓަކީ ބާތިލު ޗިޓެއް ކަމަށް ކަނޑައަޅައި ދިނުމަށާއި، އޭނާއަކީ ވަޒީފާއިން ވަކިވެފައިވާ ފަރާތެއް ކަމަށް ނުބެލުމަށާއި، ޓްރައިބިއުނަލުން މައްސަލަ ނިންމާތާ 7 ދުވަހުގެ ތެރޭގައި އޭނާ ވަޒީފާއަށް އަނބުރާ އިއާދަ ކޮށްދިނުމަށް އައިލެންޑް އޭވިއޭޝަނަށް އަމުރު ކޮށްފިނުމަށްވެސް އެދިފައިވެއވެެ.
މީގެ އިތުރުން ވަޒީފާއިން ވަޖިކުރި ތާރީޚުން ފެށިގެން ޓްރައިބިއުނަލުން މައްސަލަ ނިންމުމާ ހަމައަށް ހޭދަވި މުއްދަތުގައި، ވަޒިފާގައި ދެމިހުރިނަމަ ލިބޭނެ އެންމެހާ މުސާރަ އާއި، އިނާޔަތްތަކާއި ކުރިއެރުންތަކާއި، ވަޒީފާއިން ވަކިކުރުމާއި ގުޅިގެން ލިބުނު މާލީ ގެއްލުމުގެ ބަދަލުގެ ގޮތުން ތިންމަސް ދުވަހުގެ މުސާރައަށްވާ ފައިސާ އާއި ޓްރައިބިއުނަލަށް މައްސަލަ ހުށަހެޅުމަށް ޤާނޫނީ ވަކީލުން އައްޔަން ކުރުމަށާއި، ޓްރައިބިއުނަލަށް މައްސަލަ ހުށަހަޅައި ކުރިއަށް ގެންދިއުމަށް ހިނގާފައިވާ ޚަރަދު ތަކަކީ އައިލެންޑް އޭވިއޭޝަނުން ޒިންމާވާންޖެހޭ ޚަރަދު ތަކެއް ކަމަށް ކަނޑައޅައި ދިނުމަށްވެސް އެދިފައިވެއެވެ.
އަދި އޭނާ ވަޒީފާއިން ވަކިކުރުމާ ގުޅިގެން ވަޒީފާއާބެހޭ ޤާނޫނުގެ ދަށުން އައިލެންޑް އޭވިއޭޝަނުން އަދުލުވެދި ބަދަލެއް ނަގައިދިނުމާއެކު، މައްސަލަ ނިންމިތާ 7 ދުވަސް ތެރޭގައި އެ ބަދަލު އޭނާއަށް ދިނުމަށް އައިލެންޑް އޭވިއޭޝަންގެ މައްޗަށް އަމުރު ކޮށްދިނުމަށްވެސް އެދިފައިވެއެވެ.
މި މައްސަލަ ބެލުމަށްފަހު ޓްރައިބިއުނަލުން ނިންމި ނިންމުމުގައި ވަނީ، ޖެނިފާ ވަޒީފާއިން ވަކި ކޮށްފައި ވަނީ، މުވައްޒަފަކު ވަޒީފާއިން ވަކި ކުރުމަށް ހުއްދަ ކުރާފަދަ ހާލަތެއް މެދުވެރިވެެގެން ކަމަށް ބުރަނުވެވޭތީ އޭނާ ވަޒީފާއިން ވަކިކޮށްފައި ވަނި ޤާނޫނާ ޚިލާފަށް ކަމަށެވެ. އަދި އޭނާ އަދާކުރަމުން ދިޔަ މަގާމަށް އަނބުރާ ރުޖޫއަ ކުރުމަށާއި، ޖެނީފާއަކީ ވަޒީފާއިން ވަކި ވެފައިވާ ފަރާތެއް ކަމަށް ބެލުމަށާއި، ވަޒީފާއިން ވަކިކުރި ތާރީހުން ފެށިގެން ވަޒީފާއާބެހޭ ޓްރައިބިއުނަލުން މައްސަލަ ނިންމުމާ ހަމައަށް ހޭދަވި މުއްދަތަށް ޖެނީފާ ވަޒީފާގައި ދެމިހުރިނަމަ ހައްގުވާނޭ މުސާރަ އާއި އިނާޔަތްތައް ނަގައިދިނުމަށްވެސް ބުނެފައިވެއެވެ.
ޖެނީފާ ވަޒީފާއިން ވަކިކޮށްފައި ވަނީ މުވައްޒަފަކު ވަޒީފާއިން ވަކި ކުރެވޭފަދަ އެކަށީގެންވާ ސަބަބެއް ނެތި ކަމަށް ބުރަވެވޭތީ ގެއްލުމުގެ ބަދަލެއްގެ ގޮތުން ވަޒީފާއިން ވަކިކުރިއިރު މުސާރަ އާއި އިނާޔަތްތަކުގެ ގޮތުގައި ލިބެމުންދިޔަ 57،171 ރުފިޔާގެ ނިސްބަތުން އެއްމަސް ދުވަހަށްވާ ފައިސާ ނަގައިދިނުމަށްކަނޑައަޅައި 30 ދުވަހުގެ ތެރޭގައި އެ ހުރިހާ ކަމެއް ފުރިހަމައަށް ތަންފީޒު ކުރުމަށްފަހު އެކަން ހަމަޖެހޭތާ 3 ދުވަހުގެ ތެރޭގައި ޓްރައިބިއުނަލަށް އެންގުމަށް އައިލެންޑް އޭވިއޭޝަން ސާވިސް ލިމިޓެޑުގެ މައްޗަށް ޓްރައިބިއުނަލުން ވަނީ އަމުރު ކޮށްފައެވެ.
