ކުރީގެ ސަރުކާރުން ކުރިއަށް ގެންދިޔަ "ބިންވެރިޔާ ސްކީމް"ގެ ދަށުން، ގިރާވަރުފަޅުން ދޫކުރި ގޯތި ލިބުނު މީހުންގެ ތެރެއިން ގުޅިފަޅަށް ގޯތި ބަދަލުކުރި މީހުންނާއެކު، ގުޅިފަޅުން ގޯތި ލިބުނު އެންމެންގެ ގުރުއަތުލުން މި ހަފްތާގެ އަންގާރަ ދުވަހު ބާއްވަން ހައުސިންގ މިނިސްޓްރީން ނިންމައިފިއެވެ.
އަންގާރަ ދުވަހު ގުރުއަތުލުން އޮންނާނީ ހެނދުނު 9 ޖަހާއިރު، ދަރުބާރުގެ ރަންނަ ބަނޑޭރި މާލަމުގައި ކަމަށް މިނިސްޓްރީން ވަނީ ބުނެފައެވެ. ގޯތި ލިބޭ ފަރާތުގެ ބަދަލުގައި އެހެން މީހަކު ގުރުއަތުލުމަށް ހާޒިރުވާނަމަ، ގޯތި ލިބުނު ފަރާތުގެ އިއުތިރާޒެއް ނެތް ކަމުގެ ލިޔުމާއި އައިޑީކާޑުގެ ކޮޕީ ހިފައިގެން ދިޔުމަށްވެސް މިނިސްޓްރީން ވަނީ ބުނެފައެވެ.
ހައުސިންގ މިނިސްޓްރީން ގެޒެޓްކުރި އިއުލާނެއްގައިވާ ގޮތުން މި މަހު 15 ވަނަ ދުވަހު ޝާއިއުކޮށްފައިވާ 'ގުޅިފަޅު ލޭންޑް ޔޫސް ޕްލޭން’ގެ ދަށުން އައިސްފައިވާ ބަދަލާ ގުޅިގެން ކުރިން ބިންވެރިޔާ ސްކީމުގެ ދަށުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން މިހާރުވަނީ ކުރެވިފައެވެ. އެހެންވެ އެއައި ބަދަލާއެކު، ގޯތިތަކުގެ ވެރިފަރާތްތަކާއި، މިހާތަނަށް ގުޅީފަޅުން ގޯތި ހަވާލުކޮށްފައިވާ ފަރާތްތަކުގެ އިތުރުން، ގިރާވަޅު ފަޅުން ލިބުނު ގޯތިތައް ގުޅިފަޅަށް ބަދަލު ކުރަން އެދުނު ފަރާތްތަކުގެ ތެރެއިން ގުރުނަގައިގެން ގުޅިފަޅަށް ބަދަލުވެފައިވާ ފަރާތްތަކުގެ ގުރުނެގުން އަންގާރަ ދުވަހު އޮންނާނެ ކަމަށް ވަނީ ބުނެފައެވެ.
އަންގާރަ ދުވަހު ގުރު ނަގާނީ ދަރުބާރުގެ ރަންނަ ބަނޑޭރި މާލަމުގައި ކަމަށްވާއިރު، ގުރު ނަގަން ފަށާނީ ހެނދުނު 9:00ގައެވެ.
ގުޅިފަޅުން ދޫކުރާ ގޯތިތަކުގެ ބޮޑުމިނާއި ގޯތީގެ އަދަދުތައް:
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
ގުޅިފަޅުން ގޯތި ލިބޭ މީހުންގެ ގުރު ނެގުން ކުރިއަށް ދާނީ މިނިސްޓްރީން އެކުލަވާލާފައިވާ ލިސްޓުތަކުގައިވާ ތަރުތީބުންނެވެ. ގޯތިތަކުގެ ބޮޑުމިން ވަކިކޮށް، މިނިސްޓްރީން ވަނީ އެ ލިސްޓުތައް ގެޒެޓުގައިވެސް ޝާއިއުކޮށްފައެވެ.
