ރާއްޖޭގެ މަރުގެ ހުކުމް ތަންފީޒު ކުރުމަށް ކުރަންޖެހޭ ކަންކަން ކުރަމުންދާ ކަމަށް ހޯމް ލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އިހުސާން ވިދާޅުވީ މަރުގެ ހުކުމް ތަންފީޒު ކުރުމަށް ތައްޔާރުވަމުންދާއިރު، މިހާރުވެސް ދެ މީހަކަށް އެފަދަ ހުކުމެއް ކުރެވޭ ވަރަށް ކަންކަން ކުރިއަށް ގެންގޮސްފައިވާ ކަމަށެވެ.
"އަޅުގަނޑުމެން މިހާރު ހުރިހާ ކަންތައްތަކެއް ނިމި، އަޅުގަނޑު ހަނދާންވާ ގޮތުން ނަމަ، ސުވާލު ނުއުފެދޭ މިންވަރަށް ދެ މީހެއްގެ މައްސަލަ އެބަ އުޅޭ، އަނެއް ބައި މީހުންގެ ކޮންމެވެސް ވަރެއްގެ ލީގަލް ގްރައުންޑްތަކެއް ނަގާފައި އެބަ ހުރި އެކިއެކި ތަންތަނުގައި،". އިހުސާން ވިދާޅުވި އެވެ.
"އަޅުގަނޑަށް ޔަގީންކަން ދޭން ކެރިދާނެ، މިހާރު އިއުލާން ކުރައްވާފައިވާ ގޮތަށް، އެކަން ކުރާނެ ރާއްޖޭގައި،". އިހުސާން ވިދާޅުވި އެވެ.
ރާއްޖެއަކީ އިސްލާމީ ގައުމެއް ކަމަށާއި އިސްލާމް ދީނުގެ އަސާސްތަކާ އެއްގޮތަށް ރާއްޖޭގައި ހުކުމް ތަންފީޒުކުރާނެކަން ރާއްޖޭގެ ހިއުމަން ރަައިޓްސް ރިވިއުގައިވެސް ބަޔާންކޮށްފައިވާނެ ކަމަށް އިހުސާން ވިދާޅުވި އެވެ.
އިހުސާން ވިދާޅުވީ، ދެން އޮތީ ތަންފީޒީ މަރުހަލާ ކަމަށާއި، އެއަށް ހަދަން ޖެހޭ އުސޫލުތަކާއި ގަވާއިދުތައް ހަދައި، ތަން ތައްޔާރުކޮށް، މީހުންވެސް ތަމްރީނު ކުރަމުންދާ ކަމަށެވެ.
