ރާއްޖެއިން، ފަލަސްތީނަށް ހަދިޔާކުރާ ދެ މިލިއަން މަސްދަޅުގެ ފުރަތަމަ ޝިޕްމެންޓް މިމަހު 15 ގައި ފޮނުވާނެ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެ އެވެ.

ފަލަސްތީނުގެ ރައްޔިތުންނަށް އެހީވުމުގެ ގޮތުން ރާއްޖެއިން ފަލަސްތީނަށް ދެމިލިއަން މަސްދަޅު ހަދިޔާ ކުރެއްވުމަށް ސަރުކާރުން ނިންމިކަން އިއުލާންކުރީ 2023 އޮކްޓޫބާ 24 ގައި އެއިރުގެ ފޮރިން މިނިސްޓަރު އަބްދުﷲ ޝާހިދެވެ.

ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ފަލަސްތީންގެ ރައްޔިތުން، އެބައިމީހުންގެ ވަކި ދައުލަތެއް އުފެއްދުމަށާއި އެބައިމީހުންގެ ހައްގުތައް ކަށަވަރުކުރުމަށްޓަކައި ކުރަމުންގެންދާ މަސައްކަތްތަކުގައި އެއްވެސް ޝަރުތަކާ ނުލައި ތާއީދުކުރުންމަތީ ދިވެހި ސަރުކާރާއި ދިވެހި ރައްޔިތުން ތިބޭނެ ކަމަށެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހީނާ ވިދާޅުވީ ދެ މިލިއަން މަސްދަޅު ފޮނުވުމަށް ހަމަޖެހިފައިވަނީ ދެ ޝިޕްމެންޓަކަށް ބަހާލައިގެން ކަމަށެވެ. އެގޮތުން މިމަހު 15 ގައި ފޮނުވާ ފުރަތަމަ ޝިޕްމެންޓް ފަލަސްތީނަށް ލިބޭނީ 40 ދުވަސް ފަހުން ކަމަށް ހީނާ ވިދާޅުވި އެވެ.

އަދި ވިދާޅުވީ ފަކަސްތީނުގެ ރައްޔިތުންނަށް އެހީވުމުގެ ގޮތުން ހަދިޔާކުރަން ނިންމި އެ ދެ މިލިއަން މަސްދަޅުތައް ފޮނުވާނީ މިސްރުގެ ރެޑް ކްރެސެންޓް މެދުވެރިކޮށް ކަމަށެވެ. ހީނާ ވިދާޅުވީ އޭގެ ފަހުން މިސްރުގެ ރެޑް ކްރެސެންޓުން ފަލަސްތީނުގެ ރެޑްކްރެސެންޓާ ހަވާލުކުރާނެ ކަމަށެވެ.