ޔޫތް މިނިސްޓްރީގެ ޑެޕިއުޓީ މިނިސްޓަރުގެ މަގާމުން މަރިޔަމް ޝިއުނާ އާއި މަލްޝާ ޝަރީފް އިސްތިއުފާ ދެއްވައިފި އެވެ.
ޝިއުނާއި މަލްޝާ، އެ މަގާމުން އިސްތިއުފާ ދެއްވިއިރު އެ ދެ މީހުން މަގާމުން ސަސްޕެންޑް ކޮށްފައިވާތާ ވަނީ ހަ މަހަށްވުރެ ގިނަ ދުވަސް ވެފަ އެވެ.
އެނގިފައިވާ ގޮތުގައި ޝިއުނާއާއި މަލްޝާ، ޑެޕިއުޓީ މިނިސްޓަރުގެ މަގާމުން އިސްތިއުފާ ދެއްވީ މިއަދެވެ.
ޑެޕިއުޓީ މިނިސްޓަރުގެ މަގާމުން ޝިއުނާއާއި މަލްޝާ، ސަސްޕެންޑު ކޮށްފައިވަނީ މިދިޔަ ޖެނުއަރީ މަހު އިންޑިއާ އިން ލަކްޝަދީޕްގެ ޓޫރިޒަމް ފުޅާކުރުމަށް ނިންމުމާ އެކު ސޯޝަލް މީޑިއާގައި ކުރި ޓްވީޓުތަކެއްގެ މައްސަލައިގައެވެ. އެ ސަރަހައްދުގެ ޓޫރިޒަމް ޕްރޮމޯޓްކުރައްވައި އިންޑިއާގެ ބޮޑު ވަޒީރު ނަރެންދްރަ މޯދީ އާންމު ކުރެއްވި ވީޑިއޯއަކާ ގުޅިގެން މޯދީ އަށް އިހްތިރާމް ކުޑަކޮށް، އެ މީހުން ވަނީ ފާޑުކިޔައިފަ އެވެ.
އެއާއެކު އިންޑިއާ ރައްޔިތުން ވަނީ ރާއްޖެ ބޮއިކޮޓް ކުރަން ގޮވާލައި ބޮޑު ކެމްޕޭނެއް ފަށައިފަ އެވެ. އެ ކެމްޕޭނުގެ ސަބަބުން ރާއްޖެ އަންނަ އިންޑިއާގެ ޓޫރިސްޓުންގެ އަދަދު ވަނީ ވަރަށް ބޮޑުތަނުން ދަށްވެފަ އެވެ.
