އެމްޑީޕީގެ ސަރުކާރުން ހިންގި ގެދޮރުވެރިޔާ ސްކީމްގެ ތެރެއިން ދޫކޮށްފައި ހުރި ފުލެޓުތައް ދިން މީހުންގެ ލިސްޓުގައި ހިމެނޭ ގިނަ މީހުންނަކީ 'ވައްކަންތައް’ކޮށްގެން ލިސްޓުގައި ތިބި މީހުން ކަމަށާއި އެ މީހުންނަށް ފުލެޓް ނުދެވޭނެ ކަމަށް ޕީއެންސީގެ ޕާލިމަންޓްރީ ގްރޫޕުގެ ސީނިއާ ޑެޕިއުޓީ ލީޑަރު އިބްރާހިމް ޝުޖާއު މިއަދު ވިދާޅުވެއްޖެއެވެ.
މަޖިލީހުގެ އިދާރާގައި ޕީއެންސީން މިއަދު ބެއްވި ނޫސްވެރިންގެ ބައްދަލުވުމެއްގައި ޝުޖާއު ވިދާޅުވީ މާލޭގައި ވަކި އަހަރެއް ވަންދެން ދިރިއުޅުނު ކަމަށް ބުނެ ދޮގު ލިޔުން ހުށަހަޅައިގެން ބައެއް މީހުން ފުލެޓް ހޯދާފައިވާ ކަމަށެވެ. އެހެންކަމުން އެއީ އިންސާފުން ކޮށްފައި އޮތް ކަމެއް ނޫން ކަމަށް ޝުޖާއު ވިދާޅުވި އެވެ.
"އޭގެ ތެރޭގައި މި އޮންނަނީ، މާލޭގައި ވަކި އަހަރެއް ވަންދެން ދިރިއުޅެފައި ހުރި މީހެއްކަމުގައިވުން.. މި ދެންނެވި ޝަރުތުތަކުގެ ތެރެއިން އެމްޑީޕީއާ ގުޅުންހުރި ކައުންސިލްތަކުން އެ ބޭފުޅުން މި ހުންނަނީ ލިޔުން ގެނެސްފައި،" ޝުޖާއު ވިދާޅުވި އެވެ.
"ކިހިނެއްތޯ އަޅުގަނޑުމެން އެ ކަހަލަ ވައްކަންތައް ކޮށްފައި ހުރި މީހުން ހިމެނޭ ލިސްޓަކަށް ފުލެޓު ދޭނީ. ނުދެވޭނެ އިނގޭތޯ،"
ރައްޔިތުން މާލޭގައި ދިރިއުޅެމުން އަންނަނީ ވަރަށް ހާލުގައި ކަމަށާއި އެކަން ރައީސް ޑރ. މުހައްމަދު މުއިއްޒަށް ވަރަށް ސާފުކޮށް އެނގިވަޑައިގަންނަވާ ކަމަށެވެ. އެހެންކަމުން އެމްޑީޕީން ތައްޔާރުކުރި ލިސްޓު އިސްލާހު ކުރުމަށްފަހު ހައްގުވެރިންނަށް މި ސަރުކާރުން ފުލެޓް ދޭނެ ކަމަށް ޝުޖާއު ވިދާޅުވި އެވެ.
