ސަރުކާރުގެ ސޯޝަލް ހައުސިން ސްކީމްތަކުން ދޫކޮށްފައިވާ ފްލެޓްތަކަށް ގަވައިދުން ކުލި ނުދައްކާ މީހުންނާއި އެ ތަންތަން ކުއްޔަށް ދިނުން ފަދަ ގަވާއިދާ ހިލާފު ކަންކަން ކުރާ ފްލެޓް ވެރިންނާ މެދު ފިޔަވަޅު އަޅާނެ ކަމުގެ އިންޒާރު ހައުސިން މިނިސްޓްރީން ދީފި އެވެ،
ހައުސިން މިނިސްޓްރީން މިރޭ ނެރުނު ނޫސްބަޔާނެއްގައި ބުނީ ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ސަރުކާރުން ވަނީ މާލެ ސަރަހައްދާއި ރާއްޖޭގެ އެކި ރަށްރަށުގައި ތަރައްގީކޮށްފައިވާ ހައުސިން ޔުނިޓްތަކުން، މަހުން މަަހަށް ދައްކަން ޖެހޭ ފައިސާގެ 20 ޕަސަންޓު މާފް ކޮށްދީފައިވާ ކަމަށެވެ. އަދި ވަނީ ގަވައިދުން ކުލި ދެއްކުމަށް މި އަހަރުގެ ޖެނުއަރީ މަހުގެ ފުރަތަމަ ދުވަހު ޔުނިޓްތަކުގެ ވެރިންނަށް އަންގާފައި ކަމަށެވެ.
"ނަމަވެސް ގިނަ ފަރާތްތަކުން އަދިވެސް ފައިސާ ދައްކަމުން ނުދާތީ، މަހުން މަހަށް ދައްކަން ޖެހޭ ފައިސާ ގަވައިދުން ދެއްކުމަށް މިނިސްޓްރީން އިލްތިމާސް ކުރަމެވެ" ހައުސިން މިނިސްޓްރީން ބުންޏެވެ.
އަދި ބުނީ ގަވާއިދުން ފައިސާ ދައްކަމުން ނުދާ ފަރާތްތަކާއި ޔުނިޓް ކަނޑައަޅާފައިވާ ބޭނުން ނޫން އެހެން ބޭނުންތަކަށް ބޭނުން ކުރުމާއި ގަވާއިދާ ހިލާފަށް ޔުނިޓަށް ބަދަލު ގެނައުމާއި ކުއްޔަށް ދިނުމާއި ގުޅޭ ކަންކަން ވެސް އެ މިނިސްޓްރީން ބަލައި ފިޔަވަޅު އަޅާނެ ކަމަށެވެ.
