ރާއްޖޭގެ ޚާއްސަ އިޤްތިސޯދީ ސަރަހައްދުތައް، (އީއީޒެޑް) ތަރައްގީ ކުރަން ސަރުކާރުން ކުރިއަށް ގެންދާ މަސައްކަތް ތަކުގެ ދަށުން، ދެ ސަރަހައްދެއް ތަރައްގީ ކުރުމަށް ދުބާއީ ކުންފުންޏަކާއި ހަވާލު ކޮށްފިއެވެ.
އެ މަސައްކަތް ހަވާލު ކޮށްފައި ވަނީ ޔޫއޭއީގެ އިންޓަނޭޝަނަލް ފްރީ ޒޯން އޮތޯރިޓީ (އިފްޒާ) އާއެވެ. އެކަމާބެހޭ އެއްބަސްވުމެއްގައި މިއަދު ވަނީ ސޮއި ކޮށްފައެވެ.
މިކަމަށްޓަކައި މީރުމާގައި ބޭއްވި ރަސްމިއްޔާތުގައި ރާއްޖޭގެ ފަރާތުން މި އެއްބަސްވުމުގައި ސޮއި ކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ.. އިފްޒާ ކުންފުނީގެ ފަރާތުން ސޮއި ކުރެއްވީ އެކުންފުނީގެ ޗެއާމަން މާޓިން ގްރެގާސް ޕެޑެސެންއެވެ.
މި ރަސްމީއްޔާތުގައި ވާހަކަ ދައްކަވަމުން މިނިސްޓަރު ސައީދު ވިދާޅުވީ، ގާތްގަނޑަކަށް 4 މަސް ދުވަހުގެ ތެރޭގައި އެގްރީމެންޓެއްގެ ދަށުން އެއްބަސްވުމަކަށް އާދެވޭނެ ކަމަށެވެ.
"އަޅުގަނޑުމެން ލަފާ މިކުރަނީ 4 މަސް ދުވަސް ނުވަތަ 5 މަސް ދުވަހުގެ ތެރޭގައި އެއްބަސް ވުމަކަށް އާދެވޭނެ ކަމަށް. އެއާއެކުގައި އެއްބަސްވުމުގެ ތެރެއިން އުތުރާއި ފުނަދޫގެ ފައިނޭންޝަލް ސެންޓަރ ބިލްޑް ކުރުމުގެ މަސައްކަތް ކުރިއަށް ގެންދެވޭނެ." ސައީދު ވިދާޅުވިއެވެ.
މި އެއްބަސްވުމުގެ ދަށުން ކ. ފުނަދޫ މާލީ ހަބެއްގެ ގޮތުގައި ތަރައްގީ ކުރެވޭނެއެވެ. އެގޮތުން އެރަށުގައި ގާއިމްކުރާ ފައިނޭންޝަލް ސެންޓަރު ތަރައްގީ ކުރުމާއި، މާލެއާއި ހުޅުލެ ދޭތެރޭ ބްރިޖަކުން ގުޅާލުމުގެ މަސައްކަތް އިފްޒާގެ ޚަރަދުގައި ކުރާނެ ކަމަށް މިނިސްޓަރު ވިދާޅުވިއެވެ.
މީގެއިތުރުން މިއަދު ސޮއި ކުރި އެއްބަސްވުމުގެ ދަށުން އިހަވަންދިއްޕޮޅު އިކޮނޮމިކް ގޭޓްވޭ މަޝްރޫއުގެ ތެރެއިން އިފްޒާގެ ތަޖުރިބާގެ ބޭނުންކޮށް އިންވެސްޓަރުން ގެނައުމުގެ މަސައްކަތް ކުރެވިގެންދާނެ ކަމަށްވެސް މިނިސްޓަރު ވިދާޅުވެއެވެ.
މި ރަސްމީއްޔާތުގައި ވާހަކަ ދައްކަވަމުން އިފްޒާ ކުންފުނީގެ ޗެއަރމަން މާޓިން ގްރެގާސް ޕެޑެސެން ވިދާޅުވީ، މިމަޝްރޫއުގެ ދަށުން އިންވެސްޓަރުންނާއެކު މަސައްކަތް ކޮށްގެން އިފްޒާގެ ފަރާތުން ރާއްޖެއަށް ގިނަ އިންވެސްޓްމެންޓް ތަކެއް ހޯދައި ދެވޭނެ ކަމަށެވެ.
އިފްޒާ އާއި ހަވާލުކޮށްގެން ރާއްޖޭގެ ހާއްސަ އިޤްތިސޯދީ ސަރަހައްދުތައް ތަރައްގީ ކުރުމުގެ މަސައްކަތް ކުރަނީ ރާއްޖޭގެ އިޤްތިސޯދު މާލީ ދާއިރާއިން ރާއްޖެއަށް ކުރިއެރުން ތަކެއް ހޯދުމަށް ރައިސުލްޖުމުހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ވިސްނުންފުޅާއި އެއްގޮތަށެވެ. މިއާއެކު ކުރިމަގުގައި ރާއްޖެއަކީ ވިޔަފާރީގެ ގޮތުންނާއި މާލީގޮތުން ކުރިއަރާފައިވާ އިންވެސްޓަރުންގެ މެދުގައި މަގްބޫލު ގައުމަކަށް ވެގެން ދާނެކަމަށް ސަރުކާރުން ގަބޫލުކުރެއެވެ.
