ރާއްޖޭގެ ހުރިހާ އަތޮޅު ތަކުން މިއަހަރުގެ ތެރޭގައ ޑައިލިސިސްގެ ޚިދުމަތް ލިބެން ފެށާނެ ކަމަށް ހެލްތު މިނިސްޓަރ ޑރ. އަބްދުﷲ ޚަލީލް ވިދާޅުވެއްޖެއެވެ.
މިނިސްޓަރު ޚަލީލު މިހެން ވިދާޅުވީ، އައިޖީއެމްއެޗުގެ ސިއްހީ ޚިދުމަތް ތަކުގެ ފެންވަރާއި ގުޅޭގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި، މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.
މިނިސްޓަރު ވިދާޅުވީ، ހޮސްޕިޓަލް ތަކާއި ރީޖަނަލް ހޮސްޕިޓަލް ތަކުގެ ޚިދުމަތުގެ ފެންވަރު ރަނގަޅު ކުރުމުގެ މަސައްކަތް ތަކެއް ސަރުކާރުން ފަށާފައިވާ ކަމަށެވެ. އެކަމުގެ ސަބަބުން އައިޖީއެމްއެޗަށް ބާރު ބޮޑުވުން ކުޑަވެގެންދާނެ ކަމަށްވެސް ވިދާޅުވިއެވެ.
އެ މަސައްކަތް ތަކުގެ ދަށުން އެ ހޮސްޕިޓަލް ތަކުން ކުރިން ނުލިބޭ ޚިދުމަތްތައް ވަރަށް އަވަހަށް ފޯރުކޮށްދެން ފެށޭނެ ކަމަށް މިނިސްޓަރު ވިދާޅުވިއެވެ. އޭގެތެރޭގައި އެމްއާރްއައި، ސީޓި ސްކޭން އަދި ޑައިލަސިސްގެ ޚިދުމަތް ހުރިހާ އަތޮޅެއްގައި މިއަހަރު ފެށިގެން ދާނެކަމަށް ވެސް ވިދާޅުވިއެވެ.
އެމަސައްކަތުގެ ދަށުން އައްޑޫ އިކުއިޓޯރިއަލް ހޮސްޕިޓަލާއި ތިނަދޫ ރީޖަނަލް ހޮސްޕިޓަލާއި ކުޅުދުއްފުށީ ރީޖަނަލް ހޮސްޕިޓަލާއި، ރ. އުނގޫފާރު ރީޖަނަލް ހޮސްޕިޓަލްގައި އެ ޚިދުމަތް ފެށިގެންދާނެ ކަމަށްވެސް ވިދާޅުވިއެވެ.
