ބަޖެޓުގައި އެކަށީގެންވާ މިންވަރަށް ފައިސާ ނެތުމުން، ހއ. މޮޅަދޫގައި އިމާރާތް ކުރުމަށް ސަރުކާރުން ނިންމައި އިއުލާން ކޮށްފައިވާ އެ ރަށު ސިއްހީ މަރުކަޒުގެ މަސައްކަތް ކުރިއަށް ނުގެންދެވި ހުއްޓިފައިވާ ކަމަށް ހެލްތު މިނިސްޓަރު ޑރ. އަބުދުﷲ ހަލީލު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، މޮޅަދޫ ސިއްހީ މަރުކަޒުގެ މަސައްކަތް ބަޔަކާ ހަވާލު ކުރެވޭނެ ދުވަހަކާއި އެ މަސައްކަތް ކުރިއަށް ގެންދިއުމަށް ރާވާފައިވާ ގޮތަކީ ކޮބައިތޯ އޮޅުން ފިލުއްވުމަށް، ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު މަޖިލީހުގެ މިއަދުގެ ޖަލްސާގައި މިނިސްޓަރާ ކުރެއްވި ސުވާލަށް ޖަވާބު ދެއްވަމުންނެވެ.
މިނިސްޓަރު ވިދާޅުވީ، މޮޅަދޫ ސިއްހީ މަރުކަޒުގެ މަަސައްކަތް ބިޑް ކުރެވިފައިވާ ކަމަށެވެ. އަދި އިވެލުއޭޝަން މަރުހަލާ ނިމިފައިވާ ކަމަށްވެސް ވިދާޅުވިއެވެ.
"އެހެން ނަމަވެސް މިއަހަރުގެ ބަޖެޓުގައި އެކަށީގެންވާ ވަރަށް ފައިސާ ނެތުމާ އެކުގައި އެ މަަސައްކަތް ކުރިއަށް ގެންދެވޭނެ ގޮތެއް އަދި ވަނީ ނުހޯދި،" މިނިސްޓަރު ވިދާޅުވިއެވެ.
އެހެން ނަމަވެސް މިނިސްޓަރު ވިދާޅުވީ، މިހާރު ބަޖެޓް ކުރެވިފައި އޮތް މިންވަރުން އެބޭފުޅުން ހެއްދެވި އެސެސްމަންޓްތަކުން ވެސް އެތަނަށް ޖާގައިގެ ތަނަވަސްކަން ގެންނަން ޖެހޭކަން، އެނގޭކަމަށްވެސް ވިދާޅުވިއެވެ. އެހެންކަމުން ޖާގަ ތަނަވަސް ކުރުމާއި ހިދުމަތްތައް ރަނގަޅު ކުރުމަށް ކުރަންޖެހޭ މަސައްކްތްތައް ހުރިއަށް އެބަދާ ކަމަށްވެސް ވިދާޅުވިއެވެ.
ކޮންޓްރެކްޓް ކޮށްފައިވާ މޮޅަދޫ ސިއްހީ މަރުކަޒުގެ މަސައްކަތް ކުރިއަށް ގެންދިއުމަށް ބަޖެޓުގައި ފައިސާ ނެތް ކަމަށް މިނިސްޓަރު ވިދާޅުވި ނަމަވެސް މި އަހަރަށް ފާސްކުރި ދައުލަތުގެ ބަޖެޓުގައި މޮޅަދޫ ސިއްހީ މަރުކަޒު އަޕްގްރޭޑް ކުރުމަށް އެއް މިލިއަން ރުފިޔާ ހިމަނާފައިވެއެވެ. އަދި އަންނަ އަހަރުގެ ބަޖެޓުގައި 1.2 މިލިއަން ރުފިޔާ ހިމަނާފައިވެއެވެ.
