އިސްރާއީލުން ހިފާފައިވާ ބިންތަކުގައި މީހުން އާބާދުކުރުން މިހާރުން މިހާރަށް ހުއްޓާލުމަށް ޔޫއެންގެ ސެކެޓްރީ ޖެނެރަލް އެންޓޯނިއޯ ގުޓަރޭސް ބުދަ ދުވަހު ގޮވާލައްވައިފިއެވެ.

އިސްރާއީލުން ހިފާފައިވާ ހުޅަނގު އައްސޭރީގެ ބިންތަކުގައި، ޔަހޫދީން އާބާދުކުރުމަށް، އެގައުމުގައި މިހާރުއޮތް ކަނާތު ފިޔައިގެ ސަރުކާރުން، އާ ހުއްދަތައް ދޫކުރާން ފެށުމާއި ގުޅިގެން، އެމެރިކާވެސް ހިމެނޭގޮތުން، ދުނިޔޭގެ ގިނަ ގައުމުތަކެއްގެ ފާޑު ކިޔުންތައް ވަނީ އެގައުމަށް އަމާޒު ވެފައެވެ.

މި ހަފްތާގެ ހޯމަ ދުވަހު ޔޫއެންގެ ސެކިއުރިޓީ ކައުންސިލްގައި ހިމެނޭ 15 ގައުމުންވަނީ، އިސްރާއީލުން ހުޅަނގު އައްސޭރީގައި ޔަހޫދީން އާބާދު ކުރުމަށް ކޮށްފައިވާ ޕްލޭނާމެދު ކަންބޮޑުުވުން ފާޅު ކޮށްފައެވެ.

"މިގޮތުން ބިނާ ކުރާ ކޮންމެ ގެއަކީ ސުލްހައަށް އެޅިގެންދާ ހުރަހެއް،" ފަލަސްތީނުގެ ރައްޔިތުންގެ އިންސާނީ ހައްގުތަކާއި ގުޅުންހުރި ކޮމިޓީގައި ވާހަކަ ދައްކަވަމުން ގުޓަރޭސް ވިދާޅުވެފައި ވެއެވެ.

"މީހުން އާބާދުކުރުމަށް ކުރެވޭ މި ހުރިހާ މަސައްކަތަކީވެސް ބައިނަލްއަގުވާމީ ގާނޫނުތަކާއި ޚިލާފް ކަމެއް. މިކަން ހުއްޓާލަން ޖެހޭ،" ގުޓަރޭސް ވިދާޅުވިއެވެ. "ހަމަ ނުޖެހުން ހިންގުމަކީ ނިމުމެއް ނުވާ ދެކޮޅުވެރިކަމެއް. ޓެރަރިޒަމްއަކީ އެއްގޮތަކަށްވެސް ގަބޫލު ކުރެވޭނެ ކަމެއް ނޫން."

"އަހަރެމެން މިހާރުން މިހާރަށް ސަމާލުކަން ދޭންޖެހޭ ކަމަކީ، މަސްރަހު އިތުރަށް ހޫނުވެގެން ދިޔަ ނުދިނުން. ހަމަޖެހުން ގާއިމް ކުރުމަށް މަސައްކަތް ކުރުން." ގުޓަރޭސް އިތުރަށް ވިދާޅުވިއެވެ.

ގުޓަރޭސް މިމޭރުމުން ވާހަކަ ދެއްކެވުމުގެ މަދު ގަޑިއިރުތަކެއް ކުރިން އިސްރާއީލު ސިފައިންވަނީ ފަލަސްތީނުގެ 10 މީހަކު ޝަހީދު ކޮށްލާފައެވެ.

މި 10 މީހުން ޝަހީދު ކޮށްލާފައިވަނީ، އިސްރާއީލުން ހިފާފައިވާ ފަލަސްތީނުގެ ހުޅަގު އައްސޭރީގެ ނާބުލުސް ސިޓީގައި ޔަހޫދީ ސިފައިން ހިންގި ރެއިޑެއްގައެވެ. ފަލަސްތީނުގެ ހެލްތު މިނިސްޓްރީން ބުނެފައިވަނީ، މި ހަމަނުޖެހުންތަކުގައި 102 މީހަކު ޒަޚަމް ވެފައިވާ ކަމުގައެވެ. އަދި މީގެ ތެރެއިން 82 މީހެއްގެ ގަޔަށް އަސްލު ވަޒަން އަރާފައިވާކަމަށާއި، މީގެ ތެރެއިން 6 މީހެއްގެ ހާލު ވަރަށް ސީރިއަސްކަަމަށްވެސް ފަލަސްތީނުގެ ހެލްތު މިނިސްޓްރީން ބުނެފައި ވެއެވެ.

އިސްރާއީލު އަސްކަރިއްޔާއިން ބުނެފައިވަނީ މި ރެއިޑް އަމާޒު ކުރެވިފައިވަނީ ނާބުލުސްގައި ފިލާތިބި ހަނގުރާމަވެރިންނަށް ކަމުގައެވެ.