ރީޖަނަލް އެއަޕޯޓްސް ކޮމްޕެނީ ލިމިޓެޑްގެ އެޑްމިނިސްޓްރޭޓިވް އޮފިސަރު ކަމުގެ މަގާމުން ވަކިކުރި، ގދ. ފިޔޯރީ އައްޑޫގެ މުހައްމަދު އަލާއުއަށް 47،666 ރުފިޔާ ދިނުމަށްފަހު ވަޒީފާއަށް ރުޖޫއަ ކުރުމަށް ވަޒީފާއާބެހޭ ޓްރައިބިއުނަލުން ރީޖަނަލް އެއަޕޯޓްސް ކޮމްޕެނީގެ މައްޗަށް އަމުރުކޮށްފިއެވެ.

މިއީ ރީޖަނަލް އެއަޕޯޓްސް ކޮމްޕެނީ ލިމިޓެޑުންން ހިންގާ ފަރެސް މާތޮޑާ އެއާޕޯޓްގައި އެޑްމިނިސްޓްރޭޓިވް އޮފިސަރެއްގެ މަގާމުގައި މުހައްމަދު އަލާއު ވަޒީފާ އަދާކުރަމުން ދަނިކޮށް ވަކިކުރި މައްސަލައެވެ.

މި މައްސަލަ ޓްރައިބިއުނަލަށް ހުށަހަޅަމުން އަލާއު ބުނެފައި ވަނީ ތިނެއް ސެޕްޓެމްބަރު 2025 ގައި އޭނާ ވަޒީފާއިން ވަކިކުރީ އެއްވެސް ނޯޓިސް އެއް ދިނުމެއްނެތި އަދި ނޯޓިސްގެ މުއްދަތަށްވާ ފައިސާވެސް ނނުދީ ކަމަށެވެ.

އޭގެ އިތުރުން ވަޒީފާއާބެހޭ ގާނޫނުގައި ބަޔާންކޮށްފައިވާ ފަދަ ހާލަތެއް ވުޖޫދުވެފައި ނުވަނީސް، މުވައްޒަފަކު ވަޒީފާއިން ވަކި ކުރުމުގައި ފުރިހަމަ ކުރަންޖެހޭ އިޖުރާއަތުތައް ފުރިހަމަ ނުކޮށް އޭނާ ވަކިކުރީ ވަޒީފާއާބެހޭ ގާނޫނާއި ދިވެހި ރާއްޖޭގެ މަތީ މަރުހަލާގެ ކޯޓުތަކުން ކަނޑައަޅާފައިވާ އުސޫލުތަކާ ހިލާފަށް ކަމަށްވެސް ބުނެފައިވެއެވެ.

އޭނާގެ ފަރާތުން ޓްރައިބިއުނަލްގައި އެދުނީ، ވަޒީފާއިން ވަކިކޮށްފައި ވަނީ ވަޒީފާއާބެހޭ ގާނޫނާއި ދިވެހި ރާއްޖޭގެ މަތީ މަރުހަޅާގެ ކޯޓުތަކުން ކަނޑައަޅާފައިވާ އުސޫލުތަކާ ހިލާފަށް ކަމަށް ކަނޑައަޅައި ދިނުމަށާއި، އޭނާ އަދާކުރަމުންދިޔަ ވަޒީފާ، އިއާދަ ކޮށްދިނުމަށާއި އެއްވެސް ހާލެއްގައި އޭނާއަކީ ވަޒީފާއިން ވަކިވެފައިވާ ފަރާތެއް ކަަމަށް ނުބެލުމަށް ރީޖަނަލް އެއަޕޯޓްސް ކޮމްޕެނީ ލިމިޓެޑްގެ މައްޗަށް އަމުރުކޮށްދިނުމަށެވެ.

އަދި އޭނާ ވަޒީފާއިން ވަކިކުރި ތާރީހުން ފެށިގެން ވަޒީފާ އިއާދަކޮށްދޭ ތާރީހާ ހަމައަށް ހިނގާ މުޅި މުއްދަތުގެ މުސާރަ އާއި އިނާޔަތްތަކަށްވާ ފައިސާ އެ ފަރާތަށް އެކީ އެއްފަހަރާ ދައްކާ ހަލާސް ކުރުމަށް މައްސަލަ އަމުރުކޮށްދިނުމަށްވެސް އެދިފައިވެއެވެ.

އޭނާ ވަޒީފާއިން ވަކިކޮށްފައި ވަނީ އެކަށީގެންވާ ސަބަބެއް ނެތި، މައުލޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރުމެއް ނެތިކަމުން ބަދަލެއްގެ ގޮތުގައި އެއިން ކޮށްގެ ކަމަކަށް ތިން މަސްދުހުގެ މުސާރަ އާއި އިނާޔަތްތަކަށްވާ ފައިސާ އާއި އޭނާގެ ވަކީކު ފީގެ ގޮތުގައި 10،000 ރުފިޔާއެކީ އެއް ފަހަރާ އޭނާއަށް ދެއްކުމަށް ރީޖަނަލް އެއަޕޯޓްސް ކޮމްޕެނީގެ މައްޗަށް އަމުރުކޮށްދިނުމަށްވެސް އެދިފައިވެއެވެ.

މި މައްސަލައަށް ރައްދު ދެމުން ރީޖަނަލް އެއަޕޯޓްސް ކޮމްޕެނީން ބުނެފައި ވަނީ އޭނާ ވަޒީފާއިން ވަކިކުރީ ވަޒިފާއާބެހޭ ގާނޫނާއި އޭނާގެ ޑީސިޕްލިނަރީ ޕޮލިސީ އާ އެއްގޮތަށް އިންސާފުވެރިކޮށް ކަމަށެވެ.

މީގެ އިތުރުން އޭނާ ވަޒީފާއިން ވަކިކޮށްފައި ވަނީ ގާނޫނީގޮތުން ހުއްދަ، އުސޫލީގޮތުން އަދުލުވެރި އަދި ކަނޑައެޅިގެން ބަޔާންކުރެވޭ ސަބަބުތަކުގެ މައްޗަށް ބިނާކޮށް ކަމަށްވެސް ބުނެފައިވެއެވެ.

އެހެންކަމުން މި މައްސަލަ އެެއްކޮށް ބޭރުކޮށްލުމަށް ރީޖަނަލް އެއަޕޯޓްސް ކޮމްޕެނީން ވަނީ އެދިފައެވެ.

ދެ ފަރާތުގެ ހުށަހެޅުންތަކަށް ބެލުމަށްފަހު މި މައްސަލައިގައި ޓްރައިބިއުނަލުން ކަނޑައެޅީ މުހައްމަދު އަލާއު ވަޒީފާއިން ވަކިކޮށްފައި ވަނީ އެކަށީގެންވާ ސަބަބެއް ނެތި މުވަައްޒިފަކު ވަޒީފާއިން ވަކި ކުރުމުގައި ގާއިމް ކުރަންޖެހޭ މައުލޫއީ އަދުލުވެރިކަން އަދި އިޖުރާއީ އަދުލުވެރިކަން ގާއިމް ނުކޮށް ވަޒީފާއާބެހޭ ގާނޫނާ ހިލާފށް ކަމަށެވެ.

އެގޮތަށް ގާނޫނާހިލާފަށް އޭނާ ވަޒީފާއިން ވަކިކޮށްފައި ވާނީ، އޭނާއަކީ ވަޒީފާއިން ވަކިވެފައިވާ މީހެއްކަމަށް ކަަމަށް ނުބެލުމަށާއި އޭނާ އަދާކުރަމުންދިޔަ ވަޒީފާއަށް އަނބުރާ ރުޖޫއަ ކުރުމަށް ރީޖަނަލް އެއަޕޯޓްސް ކޮމްޕެނީގެ މައްޗަށް ވަނީ އަމުރުކޮށްފައެވެ.

އަދި އޭނާގެ މުސާރައިގެ ގޮތުގައި މަހެއްގެ މައްޗަށް ލިބެމުންދިޔަ 10،000 ރުފިޔާގެ ނިސްބަތުން އޭނާ ވަޒީފާއިން ވަކިކުރި ތާރީހުން ފެށިގެން އިތުރު ވަޒީފާއެއް އަދާކުރަން ފެށި ތާރީހާ ހަމައަށް ހަތަރު މަހާއި 23 ދުވަހަށްވާ 47،666.67 ރުފިޔާ ބަދަލުގެ ގޮތުގައި ނަގައިދިނުމަށް ކަނޑައަޅައި، 28 އޮކްޓޫބަރު ވާ ބުދަ ދުވަހުގެ ކުރިން އެކަން ފުރިހަމައަށް ތަންފީޒު ކުރުމަށްފަހު ރަސްމީ ބަންދުނޫން ތިން ދުވަހުގެ ތެރޭގައި އެކަން ޓްރައިބިއުނަލަށް އަންގަން ވެސް ރީޖަނަލް އެއަޕޯޓްސް ކޮމްޕެނީގެ މައްޗަށް ޓްރައިބިއުނަލުން ވަނީ އަމުރުކޮށްފައެވެ.