ދިވެހިރާއްޖޭގެ ބާޒާރުގައި ވިއްކާ މުދަލާއި ދެވޭ ހިދުމަތްތަކުގެ އަގުތައް ނިމިދިޔަ މާޗް މަހު ދަށަށް ގޮސްފައިވާ ކަމަށް ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) އިން ހާމަކޮށްފިއެވެ.
އެ އިދާރާއިން އާންމުކޮށްފައިވާ ކޮންސިއުމާ ޕްރައިސް އިންޑެކްސް (ސީޕީއައި) ރިޕޯޓުގައިވާ ގޮތުން، މިދިޔަ އަހަރުގެ މާޗް މަހާ އަޅާބަލާއިރު މިއަހަރުގެ މާޗް މަހު މުދަލާއި ހިދުމަތުގެ އަގުތައް ވަނީ 1.72 އިންސައްތަ ދަށަށް ގޮސްފައެވެ. އަދި މިއަހަރުގެ ފެބްރުއަރީ މަހާ އަޅާބަލާއިރު މާޗް މަހު އަގުތައް ވަނީ 2.44 އިންސައްތަ ދަށްވެފައެވެ.
އަގުތަކަށް އައި މި ބަދަލުގެ އެންމެ ބޮޑު ސަބަބެއްގެ ގޮތުގައި އެންބީއެސް އިން ފާހަގަކޮށްފައިވަނީ، ނިމިދިޔަ ރޯދަމަހާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމާ އެއްގޮތަށް ކަރަންޓު ބިލްތަކުން ދިން ޑިސްކައުންޓެވެ. މިގޮތުން މާޗް މަހު އެންމެ ބޮޑަށް އަގު ދަށަށް ގޮސްފައިވަނީ ކަރަންޓުގެ ހިދުމަތުންނެވެ.
އަގުތައް ދަށަށް ދިޔަ ދާއިރާތައް:
- ކަރަންޓު: 77.03 އިންސައްތަ
- މޯބައިލް މުވާސަލާތީ ހިދުމަތް: 2.93 އިންސައްތަ
- މޭވާ: 2.40 އިންސައްތަ
- ތަރުކާރީ: 1.25 އިންސައްތަ
މުދަލާއި ހިދުމަތުގެ އަގުތައް ޖުމްލަކޮށް ދަށަށް ދިޔަ ނަމަވެސް، ބައެއް ބާވަތްތަކުގެ އަގުތައް ވަނީ އުފުލިފައެވެ. އެގޮތުން ތެލާއި ލުބްރިކަންޓްގެ އަގު 31.93 އިންސައްތަ އުފުލިފައިވާއިރު، ކަނޑު ދަތުރުފަތުރުގެ އަގު ވަނީ 21.14 އިންސައްތަ ބޮޑުވެފައެވެ. މީގެ އިތުރުން ގޭހުގެ އަގު 7.31 އިންސައްތަ، ކަނޑުމަހުގެ އަގު 1.46 އިންސައްތަ އަދި ވައިގެ ދަތުރުފަތުރުގެ އަގު 0.91 އިންސައްތަ އުފުލިފައިވާ ކަމަށް އެންބީއެސްގެ ރިޕޯޓުގައި ފާހަގަކޮށްފައިވެއެވެ.
މި ތަފާސްހިސާބުތަކުން ދައްކާ ގޮތުގައި، ރޯދަމަހު ސަރުކާރުން ދިން ލުއިތަކުގެ ސަބަބުން އާންމު ދިރިއުޅުމުގެ ހަރަދުތަކަށް ވަނީ ހެޔޮ ބަދަލެއް އައިސްފައެވެ.
