ހުޅުމާލޭ ފޭސް 2 ގައި އަލަށް އިމާރާތް ކޮށްފައިވާ ޝަހީދު އަލީ ސްކޫލް މިއަދު ހުޅުވައިފިއެވެ.
ދިރާސީ އާ އަހަރުގެ ކިޔެވުން ފެށުމާއެކު މިއަދު އެ ސްކޫލްގައި ބޭއްވި ރަސްމިއްޔާތެއްގައި ޝަހީދު އަލީ ސްކޫލް ހުޅުވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. މި ރަސްމިއްޔާތުގައި އެޑިއުކޭޝަން މިނިސްޓަރާއި މިނިސްޓްރީގެ އެހެނިހެން އިސްވެރިންނާއި ސްކޫލްގެ އިސްވެރިންނާއި ދަރިވަރުން ބައިވެރިވިއެވެ.
މިއަދު އަލަށް ކިޔަވައިދޭން ފެށި ޝަހީދު އަލީ ސްކޫލުން 2100 ދަރިވަރުންނަށް ވަނީ ޖާގަ ދީފައެވެ. އެ ސްކޫލްގައި ގްރޭޑް 1 ން ފެށިގެން 12 އަށް ކިޔަވައިދޭން ވަނީ ނިންމާފައެވެ.
ޝަހީދު އަލީ ސްކޫލްގައި ކިޔަވައިދޭން ފެށިއިރުވެސް 54 ކްލާސް ރޫމެއް ވަނީ އޭސީ ކޮށްފައެވެ. މަލްޓިޕާޕަސް ހޯލަކާއެކު ހުޅުވި މި ސްކޫލްގައި އެންމެ ޒަމާނީ އަލާތްތައް ވަނީ ގާއިމްކޮށްފައެވެ.
