އިއްޔެ އާއި ރޭ މާލެ ސަރަހައްދަށް ބޯކޮށް ވާރޭ ވެހި، މާލެ ސަރަހައްދުގެ މަގުތަކުގައި ފެންބޮޑުވެ ހިނގައި އުޅުމާއި އުޅަނދު ފަހަރު ދުއްވަން އުދަނގޫވުމުގެ ސަބަބުން މިއަދަކީ ސަރުކާރު ބަންދު ދުވަހެއް ކަމަށް ވަނީ ނިންމާފައެވެ.

ރައީސް އޮފީހުން ބުނި ގޮތުގައި މިއަދު ސަރުކާރު ބަންދު ކުރަން ރައީސުލްޖުމްހޫރިއްޔާ ނިންމެވީ، މެދުނުކެނޑި ބޯކޮށް ވާރޭވެހި އަދި ބައެއް ސަރަހައްދު ތަކުގައި ފެންބޮޑުވެ، އެކަމުގެ ސަބަބުން ވަރަށްގިނަ ރައްޔިތުންނަށް ދަތިވެ، ތަކުލީފުތަކެއް ލިބިފައިވާތީ ކަމަށެވެ.

ރޭ މާލެއަށް ވެހުނު ވާރޭގެ ސަބަބުން ފެންބޮޑުވެ ބަޔެއް ގެތަކަށްވެސް ވަނީ ފެން ވަދެ، ބޮޑެތި ގެއްލުންތަކެއް ވެފައެވެ.