އެންޓި ކޮރަޕްޝަން ކޮމިޝަން (އޭސީސީ) އިން ކުރިޔަށް ގެންދާ ތަހުގީތުތައް މާބޮޑަށް ލަސްކަމުގެ ޝަކުވާ ލިބެމުން އަންނަ ކަމަށާއި، އޭސީސީގެ ތަހުގީގުތައް އަވަސް ކުރުމަށް ޕްރޮސިއުޓަރ ޖެނެރަލް އައްބާސް ޝަރީފް (ޕީޖީ) އޭސީސީއަށް އަމުރު ކުރައްވައިފިއެވެ.

ޕީޖީ އޮފީހުން ބުނީ، ތަހުގީތުތައް ލަސްވާތީ އެކަން އައްބާސް ބެއްލެވިއިރު، ޖިނާއީ ތަހުގީގުތައް ލަސްވެފައިވާކަން ފާހަގަ ކުރެވުނު ކަމަށެވެ. އަދި ކޮރަޕްޝަނާއި ޚިޔާނާތުގެ މައްސަލަތަކުގައި ދައުލަތަށް ގެއްލޭ ފައިސާ އަނބުރާ ހޯދުމާއި، ދައުލަތާއި އާންމުންގެ މަސްލަހަތުތަކަށް އުނިކަން އަންނަމުން ދާކަން ޕީޖީއަށް ފާހަގަ ކުރެވިފައިވާ ކަމަށެވެ.

ޕީޖީ އޮފީހުން ބުނީ މި ސަބަބުތަކާހުރެ، ގާނޫނުއަސާސީގެ 223 ވަނަ މާއްދާގެ (ޅ) އާއި އެ މާއްދާގެ (ފ) ގެ ދަށުން ޕީޖީއަށް ލިބިދޭ ބާރުގެ ދަށުން، އޭސީސީ އިން ބަލަމުންދާ ޖިނާއީ މައްސަލަތައް ޕީޖީ އޮފީހަށް ހުށަހެޅުމުގައި އަމަލު ކުރާނެ ގޮތުގެ އިރުޝާދެއްވެސް މިހާރު ހަދާފައިވާ ކަމަށެވެ. މިއަދުން ފެށިގެން އެއަށް އަމަލު ކުރަން އޭސީސީއަށް ޕީޖީ ވަނީ އަމުރު ކުރައްވާފައެވެ.

ޕީޖީގެ މި އަމުރުގައި، ރާއްޖޭގައި ހިނގައިދިޔަ އެންމެ ބޮޑު ޚިޔާނާތުގެ އަމަލު ކަމަށްވާ، އެމްއެމްޕީއާރްސީގެ މައްސަލައިގެ އިތުރުން ކޮވިޑް-19 އާ ގުޅިގެން ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރުމުގެ މައްސަލަ އަދި ސަރުކާރު ހިއްސާވާ ކުންފުނިތަކާއި ބިންވެރިޔާ އަދި ގެދޮރުވެރިޔާ ސްކީމްއާ ގުޅުން ހުރި މައްސަލަތައްވެސް ފާހަގަ ކުރައްވާފައިވެއެވެ.