ފުލުހުން ރަސްމީ ޑިޔުޓީގައި ތިބޭއިރު ފޯނާ ނުކުޅުމަށާއި، ވާހަކަ ދައްކާއިރު ރީތި ބަހުން ވާހަކަ ދެއްކުމަށް ކޮމިޝަނަރ އޮފް ޕޮލިސް އަލީ ޝުޖާއު، ފުލުހުންގެ ކިބައިން އެދިވަޑައިގެންފިއެވެ.

ރޭ އޮތް، ފުލުހުންގެ 38 ވަނަ އިނީޝަލް ޓްރެއިނިން ކޯހުގެ ދަސްވެނިވުމުގެ ރަސްމިއްޔާތުގައި ޕޮލިސް ކޮމިޝަނަރު ފުލުހުންނަށް ނަސޭޙަތްތެރިވެ ވަޑައިގަންނަވަމުން ވިދާޅުވީ، ފުލުހުން މަގުމަތީގައި ތިބޭއިރު، މަގުމަތީގެ ކަންކަމަށް ސަމާލުކަންނުދީ، ފޯނާ ކުޅެން ތިބޭކަމުގެ ޝަކުވާ ވަރަށް ބޮޑަށް ލިބެމުންދާ ކަމަށެވެ.

ސީޕީ އެދިވަޑައިގަތީ ޑިޔުޓީގައި ތިބޭއިރު އަބަދުވެސް ރައްޔިތުންގެ ކަންކަމަށް ސަމާލުކަންދީ، އެކަމަށް ޚާއްސަވުމަށެވެ.

"ވަރަށް ގިނައިން ރައްޔިތުން ކުރާ ޝަކުވާއެއް އެއީ، ފުލުހުން ވަރަށް ގިނައިން މަގުމަތިން ފެނެޔޭ. އެކަމަކު ތިބެނީ ފޯނާ ކުޅޭށޭ. މަގުމަތީގައި ހިނގާ އެއްވެސް ކަމަކަށް ފަރުވާ ނުދީ ތިބެނީ ފޯނަށް ބަލަހައްޓައިގެންނޭ. މިކަން ރަނގަޅު ކުރަން އެބަޖެހޭ،" ޝުޖާއު ވިދާޅުވި އެވެ.

މީގެއިތުރުން ރައްޔިތުންނާ ކަންކަމުގައި ވާހަކަ ދައްކާއިރު، އެމީހުންނަށް އިޙްތިރާމްކޮށް ރީތި ބަހުން ވާހަކަ ދެއްކުމަށްވެސް ސީޕީ އެދިވަޑައިގެންނެވިއެވެ.